Almaty mańynda laı kóshkini júrdi

<p>QONAEV. KAZINFORM &ndash; Almaty oblysy Talǵar aýdany Besaǵash aýylyndaǵy Býrabaı kottedj qalashyǵy aýmaǵynda laı syrǵymasy tústi.</p>

Oblys ákimdiginiń habarlaýynsha, 2 mamyr kúni saǵat 11:20-da aýa raıynyń turaqsyzdyǵynan taý betkeıinen topyraq kóshkini júrdi.

«Talǵar aýdanyna qarasty Besaǵash aýyly Býrabaı kottedj qalashyǵy, Baıanaýyl kóshesi №8 mekenjaıyna kólemi 30 tekshe metr topyraq ózdiginen syrǵyp tústi. Qurbandar men zardap shekkender joq» dep habarlady ákimdikten. 

Almaty oblysy ákimdigi Býrabaı kottedj qalashyǵy Baıanaýyl kóshesindegi №16 úıdiń turǵyndaryn kóshkinnen qorǵaý maqsatynda 2021 jyly bıiktigi 4 metr jáne uzyndyǵy 144 metr tirek qabyrǵa salynǵanyn jetkizdi.

«Osy tirek qabyrǵa topyraq kóshkininiń toqtaýyna sebep boldy, osylaısha, adamdar zardap shekken joq. Jylyna eki ret kóshkin qaýpi bar kezeńde «Qazseldenqorǵaý» MM mamandary qaýipti ýchaskelerde turatyn turǵyndarǵa kóshkinniń bolý qaýpi týraly habarlama jiberedi»,-dep atap ótti Almaty oblysy ákimdiginiń baspasóz qyzmeti.

Kóshkin saldaryn joıýǵa «Qazseldenqorǵaý» mekemesi, tótenshe jaǵdaılar departamenti jáne «Qazgıdrospetsstroı» JShS mamandary tartyldy.