Almaty qýyrshaq teatry birneshe halyqaralyq festıvalde júldeli boldy
Bıyl qyrkúıek aıynyń 18-22 kúnderi aralyǵynda Grodno qalasynda ótken IV Halyqaralyq «Lıalki nad Nemanom» qýyrshaq teatrlary festıvaline búldirshinderge arnalǵan «Qazdar men aqqýlar» (rejıssser Anton Zaıtsev) ertegisimen qatysyp, «Arnaıy dıplomǵa» ıe boldy. Aıta ketken jón, «Lıalki nad Nemanom» halyqaralyq festıvali – qýyrshaq teatrlary festıvalderiniń ishindegi kórkemdik deńgeıi jaǵynan joǵary festıvalderdiń biri.
– Qazaqstan, Reseı jáne Ózbekstannyń úzdik qýyrshaq teatrlary bas qosqan óner merekesinde festıval qatysýshylary men qonaqtary, kórermenniń tolassyz qurmetine bólený – ujym úshin zor jetistik, - dep habarlady teatrdan.
Sondaı-aq Almaty Memlekettik qýyrshaq teatry 23-27 qyrkúıek aralyǵynda aralyǵynda Grýzııanyń Batýmı qalasynda ótkizilgen II Halyqaralyq «Batumi International Puppet Theatre Festival – 2024» qýyrshaq teatrlar festıvaline qatysty. Onda almatylyq óner ujymy Ýılıam Shekspırdiń pesasy sarynymen sahnalanǵan «Makbet. Illıýzııa» (rejısser Dına Jumabaeva) qoıylymyn kórsetip, «Úzdik rejısser» nomınatsııasyn ıelendi.
II Halyqaralyq «Batumi International Puppet Theatre Festival – 2024» qýyrshaq teatrlar festıvalinde Qazaqstannan tys Italııa, Ispanııa, Brazılııa, Frantsııa, Polsha, Gúrjistan memleketteriniń tanymal teatr ujymdary baq synap, kórermen nazaryna qoıylymdaryn usyndy.
Erekshe yqylasqa ıe bolǵan Almaty Memlekettik qýyrshaq teatry 2024 jyldyń 28 qyrkúıek – 2 qazan kúnderi aralyǵynda Batýmı, Kýtaısı, Ahaltsıhe, Borjomı, Tbılısı qalalarynda gastroldik is-sapar ótkizip, qazaq qýyrshaq ónerin dáriptep jatyr.
Qýyrshaq teatry qazan aıynyń 10-y kúni óziniń mereıli 89-shy maýsymynyń shymyldyǵyn túredi.
Eske salaıyq, buǵan deıin Almatynyń qýyrshaq teatry Kanadada gran-prı jeńip alǵanyn jazǵanbyz.