Almaty kóshelerinen 15 myń tekshe metr qar shyǵaryldy

<p>ALMATY. KAZINFORM &mdash; Almatynyń kommýnaldyq qyzmeti kúsheıtilgen rejımde jumys istep jatyr.</p>

Qarkúreý jumystary qala kóshelerinde táýlik boıy júrgizilip jatyr. Oǵan júzdegen tehnıka men 1 800 jumysshy tartyldy.

Foto: Almaty ákimdigi

— Joldar kóktaıǵaqqa qarsy quraldarmen óńdeldi, sondaı-aq qoǵamdyq kólik aıaldamalary qardan tazartyldy. Eki táýlikte qala boıynsha 15 200 tekshe metrge jýyq qar syrtqa shyǵaryldy, — dedi «Almaty Tazalyq» MKK bas ınjeneri Áset Tólegenov.

Foto: Almaty ákimdigi

Aıtýynsha, qar shyǵarý jumystary túnde bastalady, biraq qala turǵyndary oıanǵannan keıin bul sharýa qıyndaı túsedi.

Ol qar shyǵarý kezinde júrgizýshilerden jol jıegine kólik qoımaýdy ótingen kezde túsinistik tanytýdy surady. Sebebi bul jumysqa kedergi keltirip, kósheni qardan tazartý ýaqytyn uzartady.

Foto: Almaty ákimdigi

Osyǵan deıin Almatyda alǵashqy qar eritý pýnkti iske qosylǵany týraly jazǵan edik.

Eske salaıyq, 7-8 qańtarda Almatyǵa qalyń qar tústi.

Almaty polıtsııasy júrgizýshilerden kólikterin tek belgilengen jerge qoıýǵa shaqyrdy.