Kazinform agenttiginiń saýalyna jaýap bergen Almaty qalasynyń sport basqarmasy 2025–2026 jylǵy qysqy maýsymda qala boıynsha 11 áleýmettik (tegin) muz alańyn ashý josparlanǵanyn málimdedi.
Muz alańdary myna mekenjaılarda ornalasady:
- Alataý aýdany – «Almaty arena»;
- Bostandyq aýdany – Tuńǵysh Prezıdent saıabaǵy;
- Bostandyq aýdany – Tuńǵysh Prezıdent Qory saıabaǵy (Gandı kóshesi);
- Medeý aýdany – Respýblıka saraıy;
- Medeý aýdany – «Halyq arena»;
- Medeý aýdany – 28 panfılovshylar saıabaǵy;
- Naýryzbaı aýdany – aýdan ákimdiginiń aýmaǵy;
- Túrksib aýdany – S.Seıfýllın atyndaǵy saıabaq;
- Jetisý aýdany – «Kokjiek Garden» parki;
- Jetisý aýdany – «Gúlder» parki;
- Almaly aýdany – KBTÝ avtoturaǵy;
- Qazirgi tańda kórsetilgen 11 nysannyń altaýynda muz quıý jáne tehnıkalyq daıyndaý jumystary bastaldy. Al qalǵan nysandarda daıyndyq sharalary josparǵa sáıkes júrgizilip jatyr, - delingen basqarma jaýabynda.
Sonymen qatar vedomstvo qalada 10 kommertsııalyq muz alańy qyzmet kórsetetinin atap ótti. Jospar boıynsha áleýmettik muz alańdary daıyndyq jumystary tolyq aıaqtalǵannan keıin kezeń-kezeńmen qoldanysqa beriledi.
- Alǵashqy muz alańdarynyń ashylýy 2025 jyldyń jeltoqsan aıyna josparlanyp otyr. Ashylý merzimderi aýa raıyna jáne temperatýraǵa baılanysty naqtylanady, - dep túsindirdi basqarmadan.
Áleýmettik muz alańdaryn daıyndaý jáne olardyń maýsym boıy jumysyn qamtamasyz etýge 435 893 750 teńge jumsalǵan. Atalǵan somaǵa muz aıdyny men muz kútimi tehnıkasyna otyn-munaı ónimderi, jabdyq pen muz aıdynynyń tehnıkalyq qyzmeti, elektr jelisine qosý boıynsha elektromontajdyq jumystar kiredi.
- Muz alańdarynyń jumys kezeńi aýa raıynyń qolaılyǵyna qaraı 2026 jylǵy aqpan–naýryz aılaryna deıin jalǵasady, - delingen jaýapta.
Eske salaıyq, buǵan deıin Almatynyń Naýryzbaı aýdany jańajyldyq bezendirýge qansha qarajat jumsaıtynyn jazǵanbyz.