Saýnadaǵy lager: Almaty qalalyq bilim basqarmasynyń sheneýnigi ustaldy

<p>Almaty qalalyq Bilim basqarmasy memlekettik satyp alý bóliminiń basshysy ustaldy. Bul týraly Sybaılas jemqorlyqqa qarsy is-qımyl agenttiginiń resmı ókili Arman Tileýkenov málim etti, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«Almaty qalasy boıynsha Sybaılas jemqorlyqqa qarsy qyzmet Almaty qalasy prokýratýrasynyń úılestirýimen Bilim basqarmasy memlekettik satyp alý bóliminiń basshysyn ustady. Ol jetim jáne ata-ana qamqorlyǵynsyz qalǵan balalarǵa, megapolıstiń bilim berý mekemeleri oqýshylaryna arnalǵan lager uıymdastyrý qyzmetin kórsetýshiden 12 mln teńgeden astam somadan 10 paıyz para alýǵa áreket jasady degen kúdikke ilindi. Para jetkizýshi kompanııany konkýrstyń jeńimpazy dep tanýǵa arnalǵan», - dedi resmı ókil.

Onyń atap ótýinshe, kompanııanyń balalar lagerin tolyqqandy uıymdastyrý úshin qajetti materıaldyq jáne eńbek resýrstary bolmaǵan. Biraq, konkýrstyń jeńimpazy bolyp tanylǵan.

«Laýazymdy adam sot sanktsııasymen qamaýǵa alyndy. Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy», - dedi Arman Tileýkenov.

Eske salsaq, Almaty qalalyq bilim basqarmasy oqýshylardy jazǵy lagerdiń ornyna saýnaǵa jibergen bolatyn. Almaty qalasynyń prokýratýrasy «Saýna ǵımaratynda balalar lagerin» uıymdastyrý kezinde laýazymdyq ókilettikterdi teris paıdalaný (QR QK 361-baby) jáne kámeletke tolmaǵan adamdy tárbıeleý jónindegi mindetterdi oryndamaý (QR QK 140-baby) faktileri boıynsha sotqa deıingi tergeýdi bastady.