Almaty HQKO-lary bıyl 2,4 mıllıon adamǵa qyzmet kórsetken

<p>ALMATY. KAZINFORM - Almatyda HQKO arqyly 2 mıllıon 400 myńnan astam memlekettik qyzmet kórsetildi.</p>

«Azamattarǵa arnalǵan úkimet» memlekettik korporatsııasy Almaty fılıalynyń málimetinshe, jyl basynan beri kórsetilgen qyzmettiń ishinde kósh bastap turǵany - kólikti qaıta tirkeý qyzmeti. Bul qyzmet túrine 860 myńǵa jýyq almatylyq júginip, óz kóligin tirkeýden ótkizgen.

Ekinshi orynda – QR azamattarynyń tólqujat pen jeke kýálik alýy. Bul qyzmet úshin Almaty qalasynyń turǵyndary 400 000 ret HQKO-ǵa júgingen. Elektrondy tsıfrlyq qoltańba alý qyzmetin 300 722 myńnan asa azamat alǵan. 

Al áleýmettik sala boıynsha jalpy sany 154 300 myń qyzmet alynyp, ol suranys boıynsha tórtinshi boldy. Bestikti júrgizýshi kýáligin alý qyzmeti túıindep tur. Óńirdegi mamandandyrylǵan halyqqa qyzmet kórsetý ortalyqtarynda 116 741 myńǵa jýyq kýálik berilgen. 

- Jalpy jyl basynan beri «Azamattarǵa arnalǵan úkimet» memlekettik korporatsııasynyń Almaty fılıalynda 2,4 mln adam memlekettik qyzmet alǵan.
Sonymen qatar memlekettik qyzmetterdi halyqqa qyzmet kórsetý ortalyqtarynan bólek, «HQKO» mobıldi qosymshasy arqyly da onlaın alýǵa bolady, - dep habarlady Almaty fılıalynan.

Eske salaıyq, buǵan deıin Úkimet HQKO-lardaǵy «járdemshisymaqtardan» qalaı qutylmaq ekenin jazǵanbyz.