Almaty haıýanattar baǵyna 86 jyl toldy
Almaty haıýanattar baǵy áleýmettik jelide zoobaqtyń búgingi kúni zaman talabyna saı kórkeıip, damyǵan, aldyna úlken maqsattar qoıǵan mádenı, ǵylymı mekemege aınalǵanyn jazdy. Sondaı-aq, búginge deıin jasalǵan jumystar men aldaǵy josparymen bólisti.
«Qazirgi ýaqytta Almaty haıýanattar baǵynda janýarlar úshin qolaıly jaǵdaılar men jańa qorshaýlar salynyp, zoobaq aýmaǵy abbattandyryldy. Arystan, qasqyr, aıý sııaqty janýarlarǵa jańa volerler salyndy. Kólshikter kúrdeli jóndeýden ótti. Jem-shóp, qorek qoımasy men jemis-jıdek saqtaıtyn qoıma qurylysyn bastadyq. Jyldyń sońyna deıin qar barysy men sileýsinderge arnalǵan keń, úlken qorshaý qurylysyn salý boıynsha jobalyq-smetalyq jumystar aıaqtalady. 2024 jyly «Afrıka savannasy» men «Arktıka» iri jobalaryn iske asyra bastaımyz. Sonymen qatar, sýsıyr, kerik, zebra, aq aıý, polıar qasqyry sııaqty kóptegen janýarlardyń qorshaýlary men turaqtaryn jaqsartý jumystary iske asady», - dep jazdy zoobaq ujymy.
Almaty haıýanattar baǵy sondaı-aq jospar boıynsha jyrtqysh qustardyń, maımyldardyń turaqtaryna kúrdeli jóndeýler júrgizilip, veterınarlyq bólim men Janýarlardy tabıǵatqa jiberý (reıntrodýktsııa) ortalyǵynyń qurylysy bastalatynyn habarlady.
«Janýarlarymyzǵa qajetti jaǵdaı jasaý boıynsha josparymyz kóp. Búgingi zoobaq týǵan kúnine oraı sizderden quttyqtaýlar qabyldaımyz», - delinedi zoobaqtyń habarlamasynda.