Almaty halyqaralyq áýejaıynda týrısterge estelik syılyqtar tabys etildi

<p>ALMATY. KAZINFORM - Qazaqstan halqynyń birligi kúnin toılaý aıasynda Almaty qalasy týrızm basqarmasy QR Ulttyq qaýipsizdik komıteti Shekara qyzmetiniń Almaty qalasy shekaralyq baqylaý basqarmasymen jáne Almaty halyqaralyq áýejaıymen birlesip, &laquo;Qonaqtarǵa kádesyı&raquo; daıyndady.</p>

Halyqaralyq termınalǵa kelgen árbir jolaýshyǵa qalanyń ulttyq oıý-órnekteri men mádenı kórikti jerleri beınelengen stıkerler túrindegi sımvoldyq syılyq usynyldy. Shara 6 myńnan astam jolaýshy tasymaldaıtyn 30-ǵa jýyq halyqaralyq reısterdi qamtydy.

Foto: Almaty ákimdigi

Qalalyq týrızm basqarmasy atap ótkendeı, Almaty ártúrli jáne kóp mádenıetti atmosferasynyń arqasynda álemniń túkpir-túkpirinen kelgen saıahatshylar úshin tartymdy qala.

Aktsııa týrısterdi tartýǵa jáne eldegi alǵashqy jaǵymdy áserdi («travel experience») qalyptastyrýǵa, halyqaralyq qonaqtardyń qala tarıhy men mádenıetin qurmetteýine jáne tereń túsinýine baǵyttalǵan.

Foto: Almaty ákimdigi

«Almaty qalasynyń etnıkalyq quramynyń alýan túrliligin eskere otyryp, qazaqtar (62,4%), orystar (20,5%), uıǵyrlar (5,4%), koreıler (1,8%), tatarlar (1,5%), ýkraındar (1%), ázirbaıjandar (0,9%) jáne taǵy basqa ulttar úshin bul is-sharany ótkizý mádenıetaralyq ózara is-qımyldy nyǵaıtýǵa yqpal etedi»,- dep atap ótti qalalyq ákimdikten.

Foto: Almaty ákimdigi