«Almaty – bizdiń ortaq úıimiz» naýqanyna 400 myńnan astam adam qatysty
Kóshelerdi tazartý jumystarymen qosa, naýqan barysynda qorshaǵan ortany qorǵaýǵa jáne ekologııalyq qundylyqty qalyptastyrýǵa baǵyttalǵan kóptegen shyǵarmashylyq baıqaý, aktsııa men is-shara ótkizildi.
Soǵys ardagerlerine, múgedekterge jáne jalǵyz turatyn zeınetkerlerge kómek kórsetýge baǵyttalǵan «Jaqynyńa járdem ber» aktsııasy joǵary suranysqa ıe ári der kezinde qolǵa alynǵan aktsııanyń biri boldy. Aktsııa qorytyndysy boıynsha 992 erikti baq pen aýla aýmaǵyn tazalap, qorshaýdy, oryndyq pen baspaldaqty syrlady, 349 kómekke muqtaj adamnyń úıindegi aǵashty kesip, qoqys shyǵardy.
«Qorshaýyńdy/oryndyǵyńdy/besedkańdy boıa» aktsııasy turǵyndar arasynda erekshe suranysqa ıe boldy. Aktsııa aıasynda almatylyqtarǵa 4 240 l boıaý jáne 590 l eritkish berildi. Aktsııa úı mańyndaǵy aýmaqtyń estetıkalyq mazmunyn jáne jeke turǵyn úılerdiń qorshaýyn jaqsartýǵa baǵyttalǵan. Aktsııaǵa qatysqysy keletinderge lak-boıaý materıaldary tegin berildi.
«Merzimi ótken dári-dármekti tapsyr – tabıǵatty saqta» aktsııasy aıasynda 36 qalalyq emhanada ashylǵan qabyldaý pýnktine 2 815 dana nemese 76 keliden astam paıdalanýǵa jaramsyz dárilik preparattar kelip tústi. Aktsııa merzimi ótken dári-dármekterdi durys kádege jaratý jáne olardyń qorshaǵan ortaǵa áseri týraly halyqtyń saýatyn arttyrýǵa baǵyttalǵan.
2 300 kg qaıta óńdeýge arnalǵan materıaldy turǵyndar syılyq kýponyna aıyrbastaý arqyly qaıtalama shıkizatty (plastıkalyq bótelke, makýlatýra, alıýmınıı banka, móldir shyny) jınaýdy yntalandyrýǵa baǵyttalǵan «Qoqysty tamaqqa aıyrbasta» aktsııasy aıasynda jınady. Barlyǵy 11 qabyldaý pýnkti jumyldyryldy, aktsııaǵa qatysýshylarǵa 1 867 azyq-túlik kýpony berildi.
Ekologııalyq mádenıetti qalyptastyrý maqsatynda bıyl 3 mamyrda Arbatta tehnıkalyq rejımde plastıkalyq bótelke men sýsynnan alıýmınıı bankalardy qabyldaý boıynsha alǵashqy fandomat ornatyldy. Jınalǵan qaıtalama óńdeletin shıkizatty paıdaly taýarlar óndiretin kásiporyndarǵa qaıta óńdeýge beriledi. Onyń ornyna turǵyndar aqshalaı túrde bonýstar ala alady nemese olardy qaıyrymdylyq maqsatqa bere alady.
Naýqan aıasynda «Taza qasbetter» aktsııasy ótip, ǵımarattardyń irgeles aýmaqtary tazalandy, terezeler men vıtrajdar jýyldy, mańdaıshalar men bılbordtar retke keltirildi. Aktsııaǵa 1 600-den astam kommertsııalyq uıym – iri saýda-oıyn-saýyq ortalyqtary, bıznes-ortalyqtar, qonaq úıler, bazarlar, sýpermarketter, dárihanalar, azyq-túlik dúkenderi jáne t.b. qatysty.
27 sáýirde qala basshysy, turǵyndar, qoǵam qaıratkerleri, depýtattar, kásipkerler, kıno jáne shoý-bıznes juldyzdarynyń qatysýymen «Almaty – baq qala» aktsııasy aıasynda jappaı aǵash otyrǵyzyldy. Naýqan barysynda qalanyń barlyq aýdanynda 8 205 jasyl jelek, onyń ishinde 4 myńnan astam alma aǵashy otyrǵyzyldy.
«Taza taýlar: qoqys jınap, túski asty tegin al» aktsııasy barysynda qala turǵyndary men eriktiler Kishi jáne Úlken Almaty shatqaldaryndaǵy «Gorelnık» jáne «Aıýsaı» vızıt ortalyqtarynyń aýmaǵyna 600 keli qoqys jınady.
Aıta keteıik, «Almaty – bizdiń ortaq úıimiz» naýqanyna qala mektepteri men joǵary oqý oryndarynyń oqýshylary belsendi túrde qatysty. Bıyl 11 sáýirde «GreenTech», «CleanTech» jáne «ClimateTech» nomınatsııalary boıynsha úzdik startap-jobalarǵa baıqaý bastaldy. Onyń qorytyndysy boıynsha 3 mamyrda Oqýshylardyń ınnovatsııalyq shyǵarmashylyq ortalyǵynda «Eco Solutions Hackathon» formatynda jarys ótti. 500-den astam qatysýshy ınnovatsııalyq jobalar men tehnologııalardy qurý úshin komandalarda jumys istedi. Taǵy 500-ge jýyq oqýshy «Qustarǵa uıa syılaıyq» chellendjine qatysty. Tehnologııa sabaǵynda 1 myńnan astam uıa daıyndalyp, mektep aýlasyna, saıabaqtar men skverlerge ornatyldy.
Bıyl 19 sáýirde barlyq jalpy bilim beretin mektepte «Mektep aýlasynyń oazısi» landshafty dızaın jobalary festıvali ótti. Іs-shara aıasynda 5-11 synyp oqýshylary 20 myńnan astam gúl, 430 jemis aǵashy jáne 200 týıa kósheti otyrǵyzyldy.
Komıýnıtı ortalyqtarda «Áleýmettik sheberhana», «EkoSort: taza qala úshin birge», «Batareıa tapsyr, tabıǵatty saqta», «Ómir aǵashy: óz aǵashyńdy otyrǵyz» jastar aktsııalary, «Akvarıým», «Taza oıyndar», «Murany saqtaý: eskertkishterdi tazalaý», «Meıirimge toly aýyl», «1 qaptama plastık = 1 keli alma», «Jaqsylyq aýlalary: ardagerler men muqtajdarǵa kómek» jáne t.b. uıymdastyryldy. Jastar uıymdarynyń eriktileri men ókilderimen birge 103 myń adamdy qamtıtyn 75 is-shara ótkizildi. Stýdentterdiń kúshimen (ál-Farabı atyndaǵy QazUÝ, ETÝ, Abylaı han atyndaǵy QazHQjÁTÝ, AEjBÝ, Abaı atyndaǵy QazUPÝ, L.B.Goncharov atyndaǵy QazAJI, QBTÝ, AGEÝ, ETÝ, ATÝ, S.D.Asfendııarov atyndaǵy QazUMÝ) 19 myń sharshy metr aýmaq abattandyrylyp, tazartyldy.
Naýqandy sporttyq júgirý qaýymdastyǵy qoldady. Baým toǵaıynda 500-den astam adamnyń qatysýymen ploggıng jarysy ótti. Shyǵarmashylyq toptar men mádenıet qaıratkerleri naýqanǵa birqatar shyǵarmashylyq jobamen úles qosty. «Qoqystan jasalǵan úzdik art-nysan» baıqaýyna 30-dan astam ótinim kelip tústi. Júlde qoryn demeýshi taǵaıyndady, ol shamamen – 2 mln teńge. Jeńimpazdardyń jumysy kreatıvti eko-habta jáne komıýnıtı ortalyqtarda kórsetiledi.
Jalpyqalalyq naýqan «Mýsorgı» fleshmobymen aıaqtaldy. Tabıǵattyń lastanýyna beısanalyq kózqarastyń saldaryn beıneleıtin almatylyq sýretshiler jasaǵan qoqystan jasalǵan kostıýmdi keıipkerler Panfılov kóshesimen Arbatqa deıin júrip ótti. Іs-shara barysynda turǵyndarǵa Almaty qalasy ákiminiń orynbasary Álisher Ábdiqadyrov júgindi. Ol «Almaty – bizdiń ortaq úıimiz» naýqanyna belsendi qatysqan jáne qoldaý kórsetken barlyq azamatqa, qoǵam qaıratkerine jáne bızneske alǵys aıtyp, 8 mamyrda resmı túrde aıaqtalǵanyna qaramastan, naýqan ıgi ister men is-áreketterde jalǵasyp, qala turǵyndary úshin kúndelikti ómirdiń bir bóligine aınalýǵa tıis ekenin atady.