Almaty áýejaıynyń jańa termınaly jumys istep tur ma
Jelide jańa termınalǵa qatysty shaǵym aıtqandardyń biri – belgili PR-sarapshy Ásel Qaraýlova.
«Qatar Airways elektrondy poshtaǵa jańa termınaldan ushatynymyz týraly habarlama jiberdi. Áýejaıǵa ózimizshe asyǵa jettik. Biraq, bári basqasha boldy – sol baıaǵy eski termınal, uzyn-sonar kezek, qapyryq jáne taǵy basqa da «keremetter». Ádettegi jaǵdaı. Termınaldy pafospen ashyp tastady, al ol áli iske qosylmaǵan. Sondyqtan erterek kelińizder, adam óte kóp», - dep jazdy ol paraqshasynda.
Almaty áýejaıynyń baspasóz qyzmeti bul rette ókpeni habarlama jibergen avıakompanııaǵa aıtý kerektigin alǵa tartty. Sebebi, «jańa termınalǵa halyqaralyq reısterdi kóshirý áli de jalǵasyp jatyr».
«Barlyq halyqaralyq reısti qoldanystaǵy termınaldan jańa termınalǵa birtindep aýystyrý josparlanyp otyr. Halyqaralyq reısterdi jańa termınalǵa tolyq aýystyrý maýsym aıynyń ishinde júzege asyrylady. Reısterdi jańa termınalǵa tolyǵymen aýystyrǵannan keıin eski termınal ishki reıster úshin paıdalanylady», - deıdi baspasóz qyzmetinen.
Almatylyq jolaýshylardyń shaǵymyna baılanysty Azamattyq avıatsııa komıteti de jaýap berdi. Komıtet baspasóz qyzmetiniń málimetine sáıkes, «Qatar Airways» áýe kompanııasy asyǵystyq tanytqan, ıaǵnı 3 maýsymnan bastap jańa termınalǵa kóshý týraly elektrondyq habarlamalardy jolaýshylarǵa merziminen buryn taratqan. Biraq sheteldik kompanııa júıelerdi ıntegratsııalaýǵa úlgermeı, bul jumystar 11 maýsymǵa shegerilgen.
«5 maýsymda «Qatar Airways» áýe kompanııasy jolaýshylarǵa reıster 11 maýsymnan bastap jańa termınaldan júzege asyrylatyndyǵy týraly habarlama jiberdi. Jolaýshylardyń 98%-y habarlamamen tanysqan.
Jalpy 1 maýsymnan bastap termınal 54 reıske qyzmet kórsetti: 1 maýsym – 9 reıs, 5 maýsym – 17 reıs. Barlyq halyqaralyq reısti (kúnine shamamen 50 reıs) tolyq aýdarý kezeń-kezeńimen júzege asyrylyp, 20 maýsymda aıaqtalady dep josparlanyp otyr», - dep málimdedi komıtetten.
Jańa termınalǵa kóshý jumystary rasymen áli aıaqtalmaǵan. Buǵan Kazinform tilshisi kóz jetkizdi. Áýejaıdyń jalpy aýmaǵynda jáne jańa termınaldyń ishinde kishigirim jóndeý jumystary júrip jatyr.
Ushyp kelip, ushyp ketip jatqan jolaýshylar da bar. Biraq jańa ǵımarat arqyly ótip jatqan jolaýshy kóp emes. Ǵımarat ishindegi dámhanalardyń biraz bóligi, dárethana men áýe kompanııalarynyń tirkeý oryndary jabyq tur.
Aıta ketsek, jýyrda Prezıdent Qasym-Jomart Toqaevtyń Almatyǵa jumys sapary qala áýejaıynyń jańa halyqaralyq termınalyn aralap kórýden bastalǵan bolatyn.
Almaty halyqaralyq áýejaıynyń Korporatıvtik kommýnıkatsııalar departamenti jańa termınal 1 maýsymda iske qosylatynyn habarlady.
Jazdyń birinshi kúni Almaty qalasy áýejaıynyń jańa termınaly alǵashqy reısterdi qabyldap, áýejaı atynan jolaýshylarǵa estelik syılyqtar tabystaldy.
Al 4 maýsym kúni «Almaty halyqaralyq áýejaıy» AQ prezıdenti Alp Er Týnga Ersoıdyń qyzmetinen ketkeni málim boldy. Ertesine-aq onyń ornyna Goker Kose taǵaıyndaldy.
Sondaı-aq TMD elderi arasynda 2023 jylǵy «Jyldyń úzdik áýejaıy» baıqaýynyń jeńimpazy týraly da oqı otyryńyz.