Almaty áýejaıynyń jańa termınaly kelesi jyldyń jazynda ashylady

<p>Almaty halyqaralyq áýejaıynyń jańa termınalynyń qurylysy qarqyndy júrip jatyr. Qazirgi ýaqytta jumystardyń 80 paıyzy aıaqtaldy. Bul týraly qala ákimi Erbolat Dosaevpen kezdesý kezinde «Almaty halyqaralyq áýejaıy» AQ prezıdenti Alyp Er Tunǵa Ersoı aıtty, dep habarlaıdy <a href="Kazinform." target="_blank" rel="noopener">Kazinform.</a></p>

Almaty ákimdiginen habarlaǵandaı, qala ákimine Almaty halyqaralyq áýejaıy men oǵan irgeles aýmaqtyń kólik ınfraqurylymyn damytýdyń 2050 jylǵa deıingi perspektıvasy jaıly sheber jospar tanystyryldy. Qujat Almatynyń Bas josparymen úılestirilgen edi. 

Sheber jospardyń birinshi kezeńi jańa jolaýshylar termınalyn salýdy jáne qoldanystaǵy termınaldy jańǵyrtýdy kózdeıdi. Búgingi tańda ushaqqa shyǵatyn joldar keńeıtildi, qosymsha aýa baptaý júıesi engizildi, jaıly jańa avtobýstar satyp alyndy. Qujatqa sáıkes basqa kezeńder aıasynda halyqaralyq baǵyttardyń sanyn kóbeıtý, jańa ǵımarattar salý, avtoturaq aımaǵyn keńeıtý jáne t. b. josparlanyp otyr. 

«Qurylys jumystary barlyq baǵyt boıynsha tolyǵymen júrip jatyr. Jańa jolaýshylar termınaly 80%-ǵa daıyn, jalpy maqsattaǵy avıatsııa ǵımaratynyń qurylysy aıaqtaldy, estakadany, ushý-qoný jolaǵyn jáne vokzal mańy aýmaǵyn qaıta jańartý jumystary jalǵasyp jatyr», - dedi Alyp Er Tunǵa Ersoı.

Ol áýe aılaǵynyń qazirgi kórsetkishterin aıta kele, júk tasymalynyń ósip otyrǵanyn sóz etip, jyl sońyna deıin 9 mıllıonynshy jolaýshy tirkeledi degen boljam jasady.

Almaty ákimi Erbolat Dosaev jolaýshylar sanynyń edáýir artýyna baılanysty qurylys jumystaryn jedeldetýdiń mańyzyna nazar aýdardy. «Almaty halyqaralyq áýejaıy» AQ prezıdenti qala basshysyna jumystyń joǵary qarqynyn eskerip, jańa termınaldy iske qosý jazǵy maýsymnyń basynda, demalys kezeńine deıin júzege asyrylatynyn baıandady.

Aıta keteıik, jańa halyqaralyq jolaýshylar termınalynyń aýdany - 53,500 sharshy metr. Jańa termınaldy iske qosý áýejaıdyń ótkizý qabiletin jylyna 7 mln-nan 14 mln adamǵa deıin arttyrýǵa múmkindik beredi.

Eske salsaq, Memleket basshysy Qasym-Jomart Toqaev Almaty qalasyna jasaǵan jumys sapary barysynda ońtústik astana áýejaıynyń jańa halyqaralyq termınaly qurylysyna ruqsat bergen edi. 

Sondaı-aq Almaty halyqaralyq áýejaıy jańa termınalynyń eskızi jarııalanǵan bolatyn.