Almaty áýejaıyna taǵy 100 mln dollar ınvestıtsııa salynady — Goker Kose

<p>ALMATY. KAZINFORM &mdash; Almatyda alǵash ret Halyqaralyq azamattyq avıatsııa uıymy (ICAO), ACI Europe jáne QR Kólik mınıstrligi men Qazaqstannyń avıatsııalyq ákimshiliginiń qoldaýymen &laquo;Green Airports&raquo; aımaqtyq semınary ótip jatyr. Іs-shara aıasynda Almaty áýejaıynyń prezıdenti Goker Kose BAQ ókilderiniń suraqtaryna jaýap berdi.</p>

Bıyl maýsym aıynyń basynda qyzmetine kirisken Goker Kose Almaty áýejaıyna nelikten jıi syn aıtylatynyna jaýap bere otyryp, munda qandaı jumystar atqarylyp jatqanyn aıtty.

— Almaty áýejaıynyń jańa termınaly ýaqytynan buryn salynyp, iske qosyldy. Sondyqtan biz keı kemshilikterdi áli de joıyp jatyrmyz. Aldaǵy ýaqytta áýejaıdyń salalaryn damytýǵa kómektesetin ınvestıtsııalar jasalady. Biz, tipti, áýejaı aýmaǵynda ornalasqan bombadan qorǵaný oryndarynda kúsheıtip jatyrmyz. Sondyqtan aldaǵy 3-4 jylda barlyǵy minsiz sapada bolady, — dedi Goker Kose.

Sondaı-aq ol megapolıstegi halyqaralyq áýejaıǵa aldaǵy ýaqytta qansha ınvestıtsııa quıý josparlanǵanyn naqtylap ótti.

— Kelesi jyldyń sońyna deıin eski áýejaı termınalyndaǵy jóndeý jumystaryn aıaqtaýdy josparlap otyrmyz. Sondaı-aq, áýejaıdyń sol jaq ushý jolaǵyna ınvestıtsııa quıylatyn bolady. Jalpy áýejaıǵa kem degende 100 mln dollar ınvestıtsııa salynady. Biz qazir naqty master-jospar jasaýdamyz, ol ınvestıtsııalardy durys baǵyttaýǵa kómektesedi, — dedi Almaty áýejaıynyń prezıdenti.

Eske salaıyq, bıyl 1 maýsym kúni Almaty halyqaralyq áýejaıynyń jańa termınaly alǵashqy reısterdi qabyldady. 

5 maýsym kúni Almaty halyqaralyq áýejaıynyń jańa prezıdenti bolyp Goker Kose taǵaıyndaldy. 

Sondaı-aq buǵan deıin Almaty áýejaıynyń prezıdenti jańa termınalǵa aıtylǵan synǵa jaýap bergenin jazǵanbyz.