11 qańtardan 12 qańtarǵa qaraǵan túni Almaty halyqaralyq áýejaıynan ushatyn reıster birneshe saǵatqa keshikti. Áleýmettik jeli qoldanýshylary buǵan áskerı áreketter sebep bolǵanyn topshylaǵan.
Áýejaıdyń baspasóz qyzmetiniń málimetinshe, Almaty halyqaralyq áýejaıy bul ýaqytta da shtattyq rejımde jumys istegen jáne qazir de qalypty jaǵdaıda qyzmetin jalǵastyryp jatyr. Almatynyń áýe keńistigi jabylǵan joq.
– Áskerı jaǵdaıdyń engizilýi nemese áskerı áreketter týraly aqparat shyndyqqa sáıkes kelmeıdi, - delingen habarlamada.
Áýejaı ókilderi qalǵan barlyq suraq boıynsha tıisti ýákiletti memlekettik organdarǵa júginýdi surady.
Eske salaıyq, buǵan deıin Almaty áýejaıynyń aýmaǵynan 2025 jylǵy 1 jeltoqsannan bastap eki avtobýs baǵyty júretinin jazǵanbyz.