Almaty-Atyraý reısindegi jolaýshy ınfarkt aldy: naýqasqa ota jasaldy

<p>ALMATY. KAZINFORM &ndash; Almatydan Atyraýǵa ushqan ushaqta jolaýshylardyń biri jedel mıokard ınfarktyn alyp, áýe kemesi 15 mınýttan soń áýejaıǵa oraldy.</p>

Ushaq jerge qonǵannan keıin er adam jedel járdem dárigerlerine tapsyrylyp, shuǵyl túrde Almaty №4 qalalyq klınıkalyq aýrýhanasyna jetkizildi.

– Naýqastyń jaǵdaıy óte aýyr dep baǵalandy. Kardıogendik shok oryn alyp, qan qysymy tómendedi, qatty entigý, aýyrsyný baıqaldy. Oǵan shuǵyl jasalǵan koronarlyq angıografııada úsh tamyrdyń zaqymdanǵany anyqtaldy. Bylaısha aıtqanda, júrektiń qanmen qamtamasyz etilýi 4% ǵana boldy. Mundaı jaǵdaıda shuǵyl otasyn jasaý qajet. Sondyqtan Almaty Qalalyq kardıologııalyq ortalyq mamandarymen keńeıtilgen konsılıým uıymdastyrdyq. Naýqasty ashyq ota jasaý úshin basqa aýrýhanaǵa aýystyrý kerek dep sheshildi. Biraq 1-1,5 saǵat ishinde naýqasta aıqyn júrek jetkiliksizdigi paıda bolyp, ony basqa aýrýhanaǵa jetkizý úlken qaýip týǵyzdy. Aldyńǵy qarynsha aralyq arterııaǵa stent qoıýdan basqa amal bolmady. Bul ota sátti oryndaldy. Qazirgi ýaqytta naýqastyń jaǵdaıy qanaǵattanarlyq, úsh kún jansaqtaý bóliminde jatty», - dedi №4 qalalyq klınıkalyq aýrýhananyń rentgen-endovaskýlıarlyq hırýrgııa jáne kardıologııa bóliminiń meńgerýshisi Asqar Narynbaev.

Foto: Almaty qalasy Qoǵamdyq densaýlyq saqtaý basqarmasy

Sondaı-aq dáriger ushaqtyń jyldam ýaqytta áýejaıǵa qaıtyp kelýi – naýqastyń ómirin saqtaǵan sheshim bolǵanyn atap ótti.

«Bul jaǵdaıda bort keri qaıtarylmaǵanda, Atyraýǵa ushý ýaqyty úsh saǵat jáne osy úsh saǵat ishinde kez kelgen ýaqytta júrek toqtap, naýqas qaıtys bolýy múmkin edi», - dedi Asqar Narynbaev.

Eske salaıyq, buǵan deıin Almatyda 5 myńǵa jýyq bala ınklıýzıvti bilimmen qamtylǵanyn jazǵanbyz.