Almaty aspanynda birtúrli dybys qaıdan shyqty

<p>ALMATY. KAZINFORM — Almatynyń birneshe aýdanynda tańǵy ýaqytta birtúrli dybys estildi. Dybys jylý elektr stansasynan shyqqany belgili boldy.</p>

Jeli qoldanýshylary birtúrli dybys shyǵyp jatqany jaıly vıdeony áleýmettik jelige júktedi.

«Tańǵy 4:44 kezinde bes mınýt boıy Almaty aspanynda shý estilip turdy» delingen jazbada.  

Jeli qoldanýshylary dybystyń qalanyń ár aımaǵynan estilgenin aıtty.

Almaty ákimdigi jylý elektr ortalyǵynyń jumysyna baılanysty dybys shyqqanyn habarlady.

«Almaty elektr stansalary» AQ baspasóz qyzmetiniń málimetinshe, 9 aqpan tańǵy saǵat 4:40–ta tehnologııalyq qorǵanys júıesi iske qosyldy. Sol sebepti jaqyn aýdandaǵy úılerdiń turǵyndaryna shý estildi. Qazandyqtyń avtomatty qorǵanysy jumysy istegen kezde bul qalypty jaǵdaı sanalady» dep habarlady ákimdiktiń baspasóz qyzmeti. 

Sondaı-aq dybys saldarynan tutynýshylardy jylýmen qamtýda eshqandaı kedergi bolmaǵany aıtylady.