Almaty ákimdigine jańa tehnıka ne úshin kerek boldy
Sessııa barysynda máslıhat depýtaty Oljas Nuraldınov qala ákiminiń orynbasary Álisher Ábdiqadyrovqa suraq qoıdy.
«Ákimdik „Almaty Tazalyq“ JShS úshin 32 arnaıy tehnıka alýǵa, „Almaty jylý jelileri“ JShS-ǵa 57 avtokólik quraly men arnaıy tehnkany, „Eco Almaty“ JShS-ǵa 19 tehnıka men jabdyq alý úshin qosymsha qarajat bólýdi surady. Bul tehnıka alynǵan jaǵdaıda ne kútiledi, olar ne úshin qoldanylady? Sondaı-aq „Almaty tazalyq“ mekemesinde búgingi kúni qansha tehnka bar, olardyń jaǵdaıy qandaı? Eskirgen tehnıkany paıdalanýdan shyǵarý josparda bar ma, bar bolsa qandaı kólemde?», — degen suraq qoıdy depýtat.
Almaty ákiminiń orynbasary Álisher Ábdiqadyrov suraqtarǵa jaýap berdi. Onyń sózinshe, «Almaty tazalyq» mekemesinde búginde 761 tehnıka bar.
«Bizdiń qaladaǵy alańdardyń aýmaqtary óte úlken ekenin bilesizder. Onyń ústine tehnıkalar tozady. Biz ótken jyly 24 tehnıkany paıdalanýdan shyǵarsaq, bıyl merzimi ótetin taǵy 29 tehnıkany esepten shyǵaramyz. Sonymen qatar, biz ótken jyldan bastap belsendi túrde mekeme parkiniń tehnıkasyn jańartýdy bastadyq. Ásirese, trotýar tehnıkasyna erekshe nazar aýdaryp otyrmyz. Elektr tartqysh kólikterin satyp aldyq. Bul qorshaǵan ortaǵa zııanyn tıgizbeıdi», — dedi Álisher Ábdiqadyrov.
«Almaty jylý jelileri» JShS-da keı tehnıkanyń jaramdylyq merzimi 23 jylǵa jetedi.
«Olar arqyly apatty jaǵdaılardy joıa alamyz. AlJJ-nyń tehparkin jańartý bizge paıdalaný shyǵyny men qalada kómirqyshqyl gazyn azaıtýǵa múmkindik beredi. Sondaı-aq, shtattan tys jaǵdaılarǵa, apattarǵa áreket etý ýaqytyn qysqartady. „Eco Almaty“ JShS-da jaǵdaı sál basqasha. Biz onda buryn bolmaǵan tehnkany alyp jatyrmyz. Mysaly, laı sorǵysh mashına óte kerek. Sondaı-aq káriz tazalaý mashınasy, shaǵyn júk tıegishterdi alyp jatyrmyz. Olar negizinen ózen arnalaryn shuǵyl tazalaýǵa kerek. Biz bul jumystyń bárin oryndaımyz», — dep atap ótti Almaty ákiminiń orynbasary Álisher Ábdiqadyrov.