Almaty ákimdiginde eki jańa basqarma qurylady
Qalalyq máslıhat kezekten tys XIV sessııa barysynda seısmıkalyq qaýipsizdik jáne jumyldyrý daıyndyǵy basqarmasyn, sondaı-aq qoǵamdyq keńistikterdi damytý basqarmasyn qurýdy bekitti.
Birinshi basqarmanyń negizgi mindeti-seısmıkalyq qaýipsizdik standarttarynyń saqtalýyn qamtamasyz etý, jer silkinisi qaýpin basqarý, tabıǵı apattar kezinde ózin qalaı ustaýdyń bazalyq daǵdylaryna úıretýdi uıymdastyrý, sondaı-aq Tótenshe jaǵdaılar departamentterin, polıtsııany, qalalyq qyzmetterdi jáne seısmıkalyq qaýipsizdik máseleleri jónindegi uıymdardy úılestirý.
«Atalǵan basqarmanyń jumysy seısmoaýdıt júrgizýge, tabıǵı jáne tehnogendik sıpattaǵy tótenshe jaǵdaılardyń týyndaý qaýpin monıtorıngteýdiń biryńǵaı júıesin ázirleýge, sondaı-aq azamattyq qorǵaný, jumyldyrý daıyndyǵy salasyndaǵy memlekettik retteý máselelerin sheshýge múmkindik beredi», - dep atap ótti Almaty ákimi apparatynyń basshysy Beıbit Shahanov depýtattar aldynda sóılegen sózinde.
Onyń aıtýynsha, seısmıkalyq qaýipsizdik jáne jumyldyrý daıyndyǵy basqarmasy is-sharalardyń aldyn alý jáne júzege asyrý máselelerimen aınalysatyn bolady, sonyń biri-seısmoaýdıt júrgizý.
Beıbit Shahanov osy jyldyń sońyna deıin aıaqtalatyn seısmoaýdıttiń nátıjeleri boıynsha Almaty qalasynda seısmıkalyq qaýipsizdikti qamtamasyz etý jóninde keshendi sharalar qabyldaý josparlanyp otyrǵanyn atap ótti.
«Almaty qalasyn damytý baǵdarlamasynyń negizgi baǵyttarynyń biri jaıly qalalyq ortany qalyptastyrý, qoǵamdyq keńistikterdi jańǵyrtý, salý jáne abattandyrý tujyrymdamalaryn ázirleý bóliginde qala basqarmalary men aýdan ákimdikteriniń jumysyn úılestiretin bolady», - dedi Beıbit Shahanov.
Aıta keterligi, jańa basqarmalardy qurý shtat sanyn kóbeıtýdi kózdemeıdi, óıtkeni olar aýdandyq ákimdikterdiń basqa basqarmalary men apparattaryn ońtaılandyrý esebinen qurylady jáne qosymsha bıýdjet qarjysy bólinbeıdi.