Almaty: «14-aýmaq» shaǵyn aýdanyndaǵy turǵyndar sýmen qamtyldy

<p>Almaty ákimi Erbolat Dosaev jumys sapary aıasynda Alataý aýdanyndaǵy &laquo;14-aýmaq&raquo; shaǵyn aýdanyndaǵy sý qubyry men káriz jelilerine qatysty máseleni sheshý boıynsha qabyldanyp jatqan sharalarmen tanysty. Sondaı-aq, sol jerde turǵyndarmen kezdesý ótti, olar ákimge ózekti máselelerdi aıtty, dep habarlaıdy Kazinform.</p>

«14-aýmaq» shaǵyn aýdanynda ınjenerlik jelilerdiń tozý máselesi sońǵy 7 jylda oryn alyp otyr.

«14-aýmaq» shaǵyn aýdanyndaǵy sýmen jabdyqtaý jáne káriz jelileri 1960-1970 jyldary salynǵan (ortasha paıdalaný merzimi 30 jyl). Jańa jelilerdi salý boıynsha joba 2017 jyly jasaldy, alaıda «Keregetas» JShS kompanııasy — josyqsyz merdigerdiń kesirinen jumystar júrgizilmedi, sot talqylaýlary ótti.

Foto: Almaty ákimdiginiń baspasóz qyzmeti

Qala ákimi Erbolat Dosaevtyń tapsyrmasy boıynsha aǵymdaǵy jyldyń kókteminde jumystardy aıaqtaý úshin 2,7 mlrd teńge kóleminde qosymsha qarajat bólindi. Bıyl mamyr aıynda «Bolashaq S qurylys» JShS jańa merdigerlik uıymymen shart jasaldy.

Alataý aýdanynyń ákimi Azamat Qaldybekov qala basshysyna jumystardyń 5 aıda 75%-ǵa aıaqtalǵany týraly baıandady. Búginde 16 problemalyq kóshe boıynsha 7,5 km sýmen qamtý jáne 5 km káriz jelilerin (barlyǵy 7.5 km) salý jumystary aıaqtaldy. Nátıjesinde jeltoqsan aıynda 5 myńnan astam adamdy qamtyǵan 630 úıdi jańa ınjenerlik jelilermen qamtamasyz etý josparlanýda.

Foto: Almaty ákimdiginiń baspasóz qyzmeti

Jumys saparynyń qorytyndysy boıynsha Erbolat Dosaev aýdan ákimine «14-aýmaq» sh/a ınjenerlik jelilerdi tartý jumystaryn aıaqtaý múmkindigin qarastyrýdy tapsyrdy. Qala basshysy shaǵyn aýdan turǵyndarymen qarym-qatynas jasaı otyryp, barlyq ınjenerlik kommýnıkatsııalar qarasha aıynyń basynda júrgiziletinin, aıdyń sońyna deıin abonentterdi qosýdy aıaqtaý josparlanǵanyn atap ótti.

«14 aýmaqtyń» turǵyndary óz kezeginde Erbolat Dosaevqa shaǵyn aýdannyń problemalaryn sheshý boıynsha qabyldanǵan sharalar úshin alǵystaryn bildirdi, sondaı-aq jaryqtandyrýdy jolǵa qoıý týraly ótinish aıtty.

Almaty ákimi syrtqy jaryqtandyrýdy modernızatsııalaýmen aınalysqan jeke kompanııaǵa qarsy sotta qalanyń jeńiske jetkenin, endi bul másele boıynsha tıisti ókilettikter aýdandar deńgeıine beriletinin aıtty.

Pılottyq joba qazirgi ýaqytta Almaly aýdanynda júzege asyrylýda. Alataý aýdanynda másele pysyqtalyp, sondaı-aq sheshiletin bolady: 10 kún ishinde AQJ-men kósheni jaryqtandyrýǵa shartqa qol qoıý josparlanýda, jaryqty qosýmen 5-6 jumys brıgadasy aınalysatyn bolady.

Eske salsaq, 2022 jyldyń basynda Erbolat Dosaev Almaty ákimi bolyp taǵaıyndalǵan soń osy «14-aýmaq» shaǵyn aýdanynda alǵash ret bolǵan edi. Turǵyndar 2017 jyldan bastap josyqsyz merdiger — «Keregetas» JShS-niń ınjenerlik jelilerdi júrgizý máselesin sheshýdi kútken edi. Endi jeti jylǵy másele oıdaǵydaı sheshildi. Osylaısha, «14-aýmaqtyń» jeti jyldyq tarıhy sátti aıaqtaldy.

Aıta keteıik, Almaty qalasy boıynsha aǵymdaǵy jyldyń 9 aıynda barlyǵy 46 km jańa sýmen jabdyqtaý jelileri, 13 káriz sorǵy stantsııalary salyndy. Jyl sońyna deıin taǵy 35 km sýmen jabdyqtaý jelileri men 10 KSS qurylysyn aıaqtaý josparlanýda. Bul sýmen jabdyqtaý jáne sý burý jelileriniń tozýyn kezeń-kezeńmen azaıtýǵa múmkindik beredi. Máselen, aǵymdaǵy jyly sýmen jabdyqtaý jelileriniń tozýyn 54,3% – ǵa (2022 j. – 55,8%), sý burýdy 57% – ǵa (2022 j. - 57,5%) deıin tómendetý josparlanýda.