Almat Kebispaev nege jas balýandarǵa jol bermeı júr – Federatsııa jaýaby

ASTANA. QazAqparat – Qazaqstan kúres federatsııasynyń Bas hatshysy Dımash Sultanov ortalyq kommýnıkatsııalar qyzmetinde ótken brıfıngide 1987 jylǵy Almat Kebispaev nege grek-rım kúresinen 76 keli salmaqtaǵy jas balýandarǵa jol bermeı júrgenin túsindirdi, dep habarlaıdy QazAqparat tilshisi.

«Grek-rım kúresinen baq synaıtyn balýandarymyzdyń ortasha jasy 29 jas ekenin aıttyńyzdar. Almat Kebispaev spartakıadada da jeńiske jetti. Nege onyń salmaǵynda nátıje tómendep ketti, ony jeńetin jas balýandar nege shyqpaı jatyr?» - dep surady BAQ ókili.

Federatsııa Bas hatshysynyń aıtýynsha, bul salmaqtaǵy negizgi balýan jaraqatyna baılanysty byltyrdan beri kúres kilemine shyǵa almaı júr. Sondyqtan, bul jolǵy Azııa chempıonatynda senim tájirıbeli Almat Kebispaevqa artylyp otyrǵan kórinedi.

«Nátıje tómendep ketti dep aıtýǵa bolmaıdy. Óıtkeni, Almattyń tájirıbesi óte mol. Jyl basyndaǵy spartakıadada kórsetken nátıjesi – tek eńbektiń arqasy. Ony bárimizge moıyndaý kerek. 67 keli salmaqta Meıirjan Shermahanbet degen balýanymyz bar. Ókinishke qaraı, byltyrdan beri jaraqatyna baılanysty úlken jarystarǵa qatysa alǵan joq. Áli emdelip jatyr. Biraq, bıylǵy Álem chempıonatyna deıin jaraqaty jazylyp, qaıtadan sapqa qosylady dep senemiz.

Al, basqa kúres túrlerine kelsek, erkin kúres sherbeleriniń arasynda jas balýandar óte jaqsy nátıje kórsetip, osy Azııa chempıonatyna qatysyp otyr. Jastar ósip keledi», - dedi Dımash Sultanov.

Buǵan deıin habarlaǵanymyzdaı, 9-14 sáýir aralyǵynda Astanada grek-rım, erkin jáne áıelder kúresinen ótetin 36-shy Azııa chemıponatyna qurlyqtyń 24 elinen 300-den astam balýan qatyspaq.

Azııa chempıonatynda jeńgen balýandardyń jattyqtyrýshylaryna da aqshalaı syıaqy beriledi.