Allergııasy barlarǵa vaktsına saldyrýǵa bola ma - allergolog

ÓSKEMEN. QazAqparat – Qazaqstanda koronavırýs pandemııasymen kúres jónindegi «El úshin egilemin» azamattyq shtabynyń múshesi, allergolog Rafael Rozensonnyń aıtýynsha, koronavırýs vaktsınasyna allergııasy bar kisiler óte sırek kezdesedi, dep habarlaıdy QazAqparat tilshisi.

«Qandaı sanattaǵy azamattarǵa ekpe alýǵa bolmaıtyndyǵy týraly san márte ret aıtyldy. Biraq «Eger vaktsınanyń birinshi komponentin alǵan adamda allergııa baıqalsa, oǵan ekinshisi salyna ma?» degen saýal kópshilikti mazalap júr. Mundaı jaǵdaı óte sırek kezdesedi. Biraq meniń qyzmetim barysynda kezdesti. Máselen, «Spýtnık V» ekpesiniń birinshi komponentin alǵan áıelde allergııalyq reaktsııa baıqalǵan. Endi oǵan vaktsınanyń ekinshi komponenti salynbaıdy. Qazir biz ol áıelge quramy jaǵynan qarsy kórsetilimderi joq basqa vaktsınany tańdap jatyrmyz», - deıdi Rafael Rozenson.

Onyń aıtýynsha, allergııasy bar adam vaktsına almas buryn allergııalyq asqynýyn emdetip alǵany jón. Bul kóbinese maýsymdyq allergııalarǵa qatysty.

«Jaz shyǵyp, aınala jasyl jelekke oranǵanda el arasynda «pollınoz» dep atalatyn allergııa túri ýshyǵady. Endi onyń aıaqtalýyna da kóp qalǵan joq. Sodan keıin esh qoryqpaı vaktsına ala berýge bolady», - dedi allergolog.

«El úshin egilemin» azamattyq shtabynyń múshesi Rafael Rozenson qazirgi ýaqytta elimizde koronavırýs juqtyrý kórsetkishi kúrt ósip ketkendikten turǵyndardy karantın sharalaryn buzbaýǵa jáne indetten qorǵanýǵa múmkindik beretin jalǵyz amal – vaktsına alýǵa shaqyrdy.