Alkogoldi shekten tys paıdalaný — qylmys deńgeıine áser etetin negizgi faktorlardyń biri — QR ІІM

<p>ASTANA. KAZINFORM &mdash; QR Úkimeti janyndaǵy Quqyq buzýshylyqtardyń aldyn alý jónindegi vedomstvoaralyq komıssııanyń otyrysynda ishki ister mınıstri Erjan Sadenov Qoǵamdyq qaýipsizdikti qamtamasyz etý tujyrymdamasy sheńberinde alkogol máselesimen kúresýge baǵyttalǵan sharalar týraly baıandady.</p>

QR ІІM Erjan Sadenovtiń aıtýynsha, kámeletke tolmaǵandarǵa alkogol ónimderin satý erejelerin buzý kórsetkishi 2 esege ósken. 

— Alkogoldi shekten tys paıdalaný Qazaqstandaǵy qylmys deńgeıine áser etetin negizgi faktorlardyń biri bolyp qalyp otyr. Qylmystardyń aıtarlyqtaı bóligi, onyń ishinde aýyr qylmystardyń jalpy sanynyń 10%-y jáne asa aýyr qylmystardyń 22,2%-y mas kúıinde jasalady. Ásirese kisi óltirý (59,4%), densaýlyqqa aýyr zııan keltirý (62,1%) jáne zorlaý (32,4%) týraly málimetter alańdatady, — deıdi vedomstvo basshysy. 

Mınıstrdiń aıtýynsha, alkogoldiń qoljetimdiligin tómendetýge jáne onyń teris saldaryn boldyrmaýǵa baǵyttalǵan birqatar zańnamalyq normalar ázirlengen:

• alkogoldi onlaın satýǵa tyıym salý;
• kóńil kóterý oryndarynyń jumysyn saǵat 02:00–ge deıin shekteý; 
• alkogoldi tek mamandandyrylǵan saýda oryndarynda satý. 

Etıl spırtiniń óndirisi men aınalymyn memlekettik retteýge qatysty tıisti zań jobasy Parlament Májilisine engizilip, qazir qaralyp jatyr.

— ІІM Tujyrymdamany iske asyrý úshin «102» arnasyna túsken sıgnaldar sany boıynsha oıyn-saýyq oryndarynyń reıtıngin qalyptastyrady. Bul azamattarǵa bos ýaqyttary úshin qaýipsiz oryndardy tańdaýǵa, al ákimdikterge sharalar ázirleýge múmkindik beredi. Sondaı-aq alkogoldi satý faktilerin anyqtaý boıynsha eriktilermen memorandýmdar jasaldy. Qazirdiń ózinde nátıjeler bar. Alkogoldi satý boıynsha talaptardyń — 2 880-den 5 784 jaǵdaıǵa deıin 2 ese kóp buzylýy anyqtaldy. Mas kúıindegi adamdardy oqshaýlaý maqsatynda medıtsınalyq aıyqtyrǵyshtar jelisi keńeıtilýde, — dedi Erjan Sadenov.

Jyl basynan beri Túrkistan, Jetisý, Aqtóbe jáne Qostanaı oblystarynda 7 jańa ortalyq ashylyp, Shymkent pen Semeı qalalarynda medıtsınalyq aıyqtyrǵyshtardyń tósek-oryndary ulǵaıtyldy. Astana men Jambyl oblysynda nysandardyń tolyp ketýi baıqalady, bul olardy odan ári keńeıtý qajettigin kórsetedi.

Buǵan deıin habarlanǵandaı, Aqtóbede esirtki daıyndap, adam óltirgen mektep muǵalimi sottaldy.