Álkeı Marǵulan jeke muraǵatynan Baýyrjan Momyshulynyń qoljazbasy bar karta tabyldy

PAVLODAR. QazAqparat - Álkeı Marǵulan atyndaǵy Pavlodar pedagogıka ýnıversıtetiniń tarıhshylary Keńes Odaǵynyń Batyry, Halyq qaharmany Baýyrjan Momyshulynyń Álkeı Marǵulanǵa tabystap ketken kartasyn anyqtady, dep habarlaıdy QazAqparat.

Ǵylym mınıstrligi málimetinshe, tarıhı qujat akademıktiń jeke muraǵatynan tabylǵan.

Bul týraly Marǵulan ýnıversıtetinde ótken konferentsııa barysynda Margulan Centre arheologııa ortalyǵynyń qyzmetkeri Eńlik Ábeýova baıandama jasap, alǵash ret kópshilik qaýymǵa jarııa etti.

Kartada Shymkent oblysynyń 1972 jylǵy ákimshilik terrıtorııasy kórsetilgen.

Atalǵan tarıhı qujatty Halyq qaharmany akademık Álkeı Marǵulanǵa 1973 jyldyń jeltoqsan aıynda bergen.

Mine, sodan beri jarty ǵasyr ýaqyt ótti.

Kartanyń basty betine Baýyrjan Momyshuly óz qolymen:

«Tarazyda Tastarııa,

Saıramdaǵy Sansyzbaı,

Arystanda Albarbarys,

Jýalyda Jolbarys,

Túrkistanda Túımenbap» degen sózder bar bizdiń elde, sol sózderdiń tarıhy tereń, astary jer astynda (arheologııa) jatqan bolar» dep jazyp qoıǵan.

Al kartanyń artqy betine syzba men onyń qysqasha anyqtamasyn keltirgen, ıaǵnı ata-babalary boıynsha aqparat berilgen.

«Bul qujattyń búgingi tańda tarıhı mańyzy óte zor. Sebebi 60-tan asyp, 70-ke taıaǵan kezdegi eki taý tulǵanyń arasyndaǵy qarym-qatynas, týǵan jerine, tarıhyna degen yqylasy sezilip tur. Baýyrjan Momyshuly jer ataýlary men batyr babalary týralya aqparatty bólise otyryp, ári qaraı zertteýge, tarıhty zerdeleýge, jańa maǵlumat alýǵa qolqa salyp otyrǵandaı», - deıdi Eńlik Qabykenqyzy.