Álııa Nazarbaevanyń qory Qytaıdan 233 ottegi kontsentratoryn satyp aldy

NUR-SULTAN. QazAqparat - Álııa Nazarbaevanyń qaıyrymdylyq qory 233 ottegi kontsentratoryn satyp aldy. Medıtsınalyq jabdyqtary bar qaıyrymdylyq júk Qytaı shekarasynan ótti, endi bul júk alýshylardyń mekenjaılaryna jiberiledi. Bul týraly QazAqparat habarlaıdy.

Emdeý úshin ómirlik mańyzy bar apparattar Mańǵystaý, Atyraý, Aqtóbe, Qaraǵandy jáne Qostanaı oblystaryndaǵy oblystyq, qalalyq jáne aýdandyq mańyzy bar 17 aýrýhanaǵa jiberiledi. Qor logıstıka boıynsha monıtorıng júrgizedi jáne 17 aýrýhananyń árqaısysymen ottegi kontsentrattaryn ýaqtyly jáne qaýipsiz jetkizý boıynsha tyǵyz jumys júrgizedi. QR Densaýlyq saqtaý mınıstrligi tynys alý apparattaryna muqtaj medıtsınalyq mekemelerdiń tizimin usyndy.

Ottegi kontsentratory ókpe aýrýlaryn emdeýde syǵylǵan ottegige qaýipsiz balama retinde qoldanylady. Apparat ony patsıentke joǵary kontsentratsııada - 90-95% mólsherde beredi. Aıta ketý kerek, aýada otteginiń mólsheri shamamen 20% quraıdy.

«Bizdiń gýmanıtarlyq kómek dárigerlerge koronovırýspen kúreste kómektesedi dep shyn júrekten úmittenemin jáne duǵa etemin, sondaı-aq Qytaıdan Qazaqstanǵa ómirlik mańyzdy apparattardy tasymaldaýǵa qatysqan barlyq adamdarǵa alǵys bildirgim keledi» - dep jazady Álııa Nursultanqyzy Instagram-da.

Esterińizge sala keteıik, koronavırýstyq pandemııa kezinde Álııa Nursultanqyzy Nazarbaevanyń qory halyqqa azyq-túlik sebetteri, dári-dármekter, kıim-keshek sertıfıkattary, sondaı-aq balalardy qashyqtan oqytý úshin noýtbýkter satyp alý túrinde birneshe ret qaıyrymdylyq kómek kórsetken bolatyn.