Álııa men Mánshúk skverin qaıta jańartý: Almaty ákimdigi merdigerden 56,1 mln teńge óndirip almaq
Almaty ákimdiginiń málimetinshe, qalalyq mamandandyrylǵan aýdanaralyq ekonomıkalyq sotynyń sheshimimen Álııa Moldaǵulova men Mánshúk Mámetova skverin qaıta jańartý jumystaryn júrgizgen merdiger uıym («ShAH» qurylys kompanııasy JShS) memlekettik satyp alýdyń talaptardy tolyq oryndamaıtyn qatysýshy retinde tanyldy.
«Merdigermen kelisimshart buzyldy, qurylys jumystaryn buzǵany úshin kompanııadan 56,1 mln teńge kóleminde turaqsyzdyq aıyby óndiriletin bolady», - dep habarlady ákimdikten.
Almaty qalasy Ekologııa jáne qorshaǵan orta basqarmasy jańa merdigerdi anyqtaýǵa qaıta konkýrs jarııalady. Konkýrstyq rásimderdiń aıaqtalýynyń boljamdy kúni – 2024 jyldyń 25 mamyry. Skverdi rekonstrýktsııalaý jumystarynyń tolyq oryndalýy – osy jyldyń sońy.
Esterińizge sala keteıik, Ekologııa jáne qorshaǵan orta basqarmasy men «Shah «Qurylys kompanııasy» JShS arasynda skverdi abattandyrý jáne rekonstrýktsııalaý jumystaryn júrgizýge shart 2022 jyldyń 15 qyrkúıeginde jasalǵan. Nysandy aıaqtaý 2023 jyldyń 31 mamyryna deıin josparlanǵan. Jobada skver aýmaǵynda ornalasqan «Odývanchık» jáne «Aqqý» sýburqaq keshenderin qaıta jańartý, tehnologııalyq jabdyqtardy, qaptaý materıaldaryn aýystyrý jáne tehnıkalyq jaılardy jóndeý jumystary kózdelgen bolatyn.
«Qoldanystaǵy asfaltty brýschatkalarǵa aýystyrý, shaǵyn arhıtektýralyq formalardy (oryndyqtar men qoqys tastaýǵa arnalǵan jáshikterdi), avtomatty sýarý júıesin ornatý jáne drenaj júıesin, syrtqy jaryqtandyrý júıesin qaıta qurý jáne qoldanystaǵy jaryqtandyrý qurylǵylaryn aýystyrý jumystary ýaqytyly júrgizilmegendikten, basqarma merdiger kompanııany sotqa berýge májbúr boldy», - dep habarlady ákimdikten.