«Álippe» men «Ana tili» oqýlyqtarymen oqytý tártibi aıqyndaldy

NUR-SULTAN. QazAqparat – «Álippe» oqýlyǵy oqýshynyń jas ereksheligine baılanysty jazyldy. Bul týraly QR Bilim jáne ǵylym vıtse-mınıstri Sholpan Karınova málim etti, dep habarlaıdy QazAqparat tilshisi.

«Jaz kezinde «Álippe» oqýlyǵyna baılanysty ózgerister memlekettik standartqa engizilgenin habarlaǵan edik. Qazirgi kezde «Álippe» oqý baǵdarlamasyn jasaýdyń jumysy aıaqtalyp, bekitildi. «Álippeni» engizýdiń, qaıtarýdyń mańyzy zor ekenin atap ótkim keledi. Sebebi «Álippe» alǵashqy oqýlyq bolsa, ol mindetti túrde oqýshynyń jas ereksheligine, fızıologııalyq ereksheligine baılanysty saı bolýy kerek. Balalar mektepke 6 jastan qabyldanady. Osy oraıda jumys toby aýqymdy sharalardy atqardy», - dep toqtaldy Sh. Karınova Ortalyq kommýnıkatsııalar qyzmetinde.

Onyń aıtýynsha, 20-dan astam jumys tobynyń otyrysy ótkizildi.

«Bul turǵyda ǵylymı negizge, tájirıbelik qoldanysqa qatysty birneshe usynys kelip tústi. Sonyń barlyǵy zerdelenip, naqty avtorlardyń qatysýymen jumys toby ózine tıesili sharalardy atqardy», - vıtse-mınıstr.

Óz kezeginde Y. Altynsarın atyndaǵy Ulttyq bilim akademııasynyń orta bilim ortalyǵynyń dırektory Manara Adamova jańartylǵan bilim mazmuny 2016 jyldan engizilgennen beri, elimizde birinshi synyptan «Saýat ashý» oqýlyǵy paıdalanylyp kelgenin eske saldy.

«Ata-analar tarapynan «Álippeni» izdegender kóp boldy. «Saýat ashý» men «Álippeniń» aıyrmashylyǵyna toqtalsaq, «Álippe» men «Ana tili» oqýlyqtary «Saýat ashýdyń» ishine kiriktirilgen bolatyn. Endi qazir ázirlenip jatqan oqý baǵdarlamasyna sáıkes shyǵarylatyn «Álippe» oqýlyǵy men «Ana tili» bólek bolady. 2021-2022 oqý jylynan bastap eki oqýlyqpen birinshi synyp balalary bilim alady», - dedi ortalyq dırektory.

Onyń sózine qaraǵanda, «Álippe» 96-98 saǵat kóleminde birinshi jartjyldyqta oqytylady. «Álippege deıingi» kezeńge 2 apta ýaqyt bólinedi. Odan keıin «Álippe» oqýlyǵy boıynsha oqytý jalǵastyrylady.

«Qańtar aıynan bastap, ıaǵnı úshinshi toqsanǵa kóshken kezeńnen oqý men jazýdy jetildirý úshin «Ana tili» oqýlyǵynyń aıasynda oqytý jalǵastyrylady», - dedi M. Adamova.

Budan buryn habarlanǵandaı, «Álippeni» engizý 2021-2022 jylǵa josparlanǵan.

Bıyl tamyz aıynda QR Bilim jáne ǵylym mınıstri Ashat Aımaǵambetov ózgeristiń aıasynda mektep baǵdarlamasyna sáıkes, 1-synyptarǵa 1-2 toqsan «Álippe», 3-4 toqsan «Ana tili» engiziletinin aıtqan edi.