Álınur Hamzın Slavıan bazarynda laýreat atandy

NUR-SULTAN. QazAqparat – 12 jastaǵy Álınur Hamzın Slavıan bazary-2022 Halyqaralyq balalar mýzykalyq baıqaýynda laýreat atanyp, ekinshi dárejeli dıplommen marapattaldy, dep habarlaıdy QazAqparat tilshisi.

Baıqaýdyń birinshi kúni Álınur Hamzın Muqaǵalı Maqataevtyń sózine jazylǵan «Qazaǵym-aı» ánin oryndady. Qazylar alqasy jerlesimizdiń ónerine eń joǵarǵy – 70 upaı berdi. Al, ekinshi kúni ol Ýılıam «Smokı» Robınsonnyń «Who'sLovin'You» ánin shyrqap, 68 upaı enshiledi. Osylaısha, jas ánshi jalpy 138 upaı jınap, laýreat atandy. Baıqaýdyń bas júldesin Belarýs ónerpazy Elıseı Kasıch jeńip aldy.

Álınur Hamzın 2010 jyly Oral qalasynda dúnıege kelgen. Búginde ol № 27 mektep-lıtseıiniń 6-synybynda oqıdy. Ónerli búldirshin keıingi 5 jylda respýblıkalyq jáne halyqaralyq konkýrstarǵa, telejobalarǵa qatysqan. Atap aıtqanda, Parıjdegi «Junior Eurovision» baıqaýynda, Tashkenttegi «Roza vostoka» halyqaralyq konkýrsynda laıyqty óner kórsetti.

Ónerpaz «Bala daýysy» telejobasynyń laýreaty, «Altyn mıkrofon» halyqaralyq vokaldyq konkýrsynyń, «Boztorgai» Halyqaralyq balalar shyǵarmashylyǵy konkýrsynyń, «Baqytty bala» Halyqaralyq konkýrsynyń dıplomanty jáne Dımash Qudaıbergenniń «Dears» arnaıy syılyǵynyń ıegeri atanǵan.

Foto: instagram.com/khamzin_alinur