Alıment tóleýden jaltarǵandardy anyqtaýǵa «Sergek» júıesi kómektesedi

NUR-SULTAN. QazAqparat – Bıyldan bastap alıment tóleýden jaltarǵandardyń kólikterin boryshty óndirý úshin alyp qoıýǵa «Sergek» júıesi kómektesetin bolady. Bul týraly QR Ádilet vıtse-mınıstri Almat Madalıev aıtty, dep habarlaıdy QazAqparat tilshisi.

«Bıyl bul jumystardy jandandyra túsetin eki jaıt bar. Birinshiden, respýblıkalyq palatamen birlese otyryp, sot oryndaýshylardyń aqparattyq júıesin «Sergek» júıesimen yqpaldastyrýdy josparlap otyrmyz. ıAǵnı, «Sergek» júıesi ornatylǵan qalalarda kólik quraldaryn tabý ońaı bolady. Sonyń nátıjesinde alıment boıynsha boryshkerlerden kólikterdi alyp qoıý arta túsedi dep oılaımyz», - dedi vıtse-mınıstr Zoom platformasynda ótken baspasóz máslıhaty barysynda.

Sonymen qatar, ol ótken jyly qabyldanǵan zań aıasynda sot oryndaýshylarynyń jaýapkershiligi kúsheıtilgenin aıtady.

«Bul jaýapkershilik áleýmettik mańyzy bar ister boıynsha arta tústi. ıAǵnı, sot oryndaýshylary áleýmettik mańyzy bar isterdi ilgeriletti jáne bizben qoıan-qoltyq jumys istep jatyr», - dedi Almat Madalıev.

Buǵan deıin QR Ádilet mınıstri Marat Beketaev boryshkerden alımentti jyljymaıtyn múlik nemese kólik esebinen óndirip alý bıyl da jalǵasatyndyǵyn aıtqanyn habarlaǵan edik.

Jalpy 2020 jyly alıment tóleýden jaltarǵandardan 76 páter men 62 kólik óndirip alynǵan bolatyn.