Alıment tólemegender kólik júrgizý quqyǵynan aıyrylady - Q. Mýsın

ASTANA. QazAqparat - Astanada alımentti qasaqana tólemeıtin «ákeler» endigári júrgizýshi quqyǵynan aıyrylatyn bolady. Búgin brıfıngte Astana qalalyq Ádilet departamentiniń basshysy Qanat Mýsın osyndaı sharanyń qabyldanatynyn aıtyp, onyń boryshkerler úshin meılinshe áserli bolatynyn málim etti.

«Bizdiń departament alımentti qasaqana tólemeı júrgen boryshkerlerdiń júrgizýshi quqyǵyn toqtatý jónindegi praktıkany zerdelep jatyr. Bul - qaryzy barlar úshin meılinshe áser etetin tetik. Osyndaı tájirıbe buǵan deıin Batys Qazaqstan jáne Aqmola oblystarynda qoldanylǵan ári tıimdiligin kórsetken bolatyn», - dedi búgin brıfıng barysynda departament basshysy.

Onyń aıtýyna qaraǵanda, búgingi tańda sot oryndaýshylary alıment tólemeı júrgen 1484 elordalyq azamatqa qatysty Qazaqstan Respýblıkasynyń aýmaǵynan shyǵýyn shekteý týraly sharalardy engizgen. Departament basshysynyń sózine qaraǵanda, turǵylyqty meken jaıyn anyqtaý múmkin bolmaıtyn alımenttik boryshkerlerge sot arqyly izdeý jarııalanady.

«Jalpy 2015 jyldyń alǵashqy jartyjyldyǵynda sot oryndaýshylarynyń jumysynda jalpy somasy 2,4 mlrd teńgeden asatyn ákimshilik aıyppuldy óndirý boıynsha 36 myń 779 atqarý óndirisiniń materıaldary boldy. Sonyń ishinde, 1,5 mlrd. teńgeni quraıtyn 19 054 qujat qaraldy. Biz ákimshilik aıyppuldardy óndirý isin belsendi ete túsý maqsatynda jol polıtsııasy basqarmasy organdarymen tyǵyz ózara árekettestik qamtamasyz etýdemiz. Jol polıtsııasymen birge qaryzy barlardy ustaý jáne olardyń avtokólikterin aıyppul turaǵyna qoıý baǵytynda birlesken reıdtik sharalar atqarylýda», - dedi Qanat Mýsın.