Alıment tólemegen 7 myń boryshkerdiń shetelge shyǵýyna tyıym salyndy

ASTANA. QazAqparat – Alıment óndirý máselesi boıynsha júrgizilip jatqan 16 345 is problemaly bolyp otyr. Bul týraly QR Ádilet mınıstri Azamat Esqaraev aıtyp berdi, dep habarlaıdy QazAqparat tilshisi.

Taldaý kórsetkendeı, alıment tólemeýdiń negizgi sebepteri – boryshkerlerdiń resmı jumys ornynyń, kiristeri jáne óndirip alýǵa bolatyn múlikterdiń bolmaýy.

«2023 jyldyń 5 aıynda alıment tólemderi boıynsha sot aktilerin oryndamaǵany úshin 1 094 boryshker ákimshilik jaýapqa tartylǵan. Іshki ister organdaryna Qylmystyq kodekstiń 139-baby sheńberinde 410 usynym joldandy, onyń 76-sy sotqa joldandy, 196 aqtaıtyn negizder boıynsha toqtatyldy, 21 isti aqtalmaıtyn negizder boıynsha toqtatý týraly sheshim qabyldandy», - dedi mınıstr ortalyq kommýnıkatsııalar qyzmetinde.

Sonymen birge, 7 myńǵa jýyq boryshkerdiń Qazaqstan Respýblıkasynan shyǵýyna ýaqytsha shekteý qoıylǵan.

«Keı jaǵdaılarda boryshkerdiń turaqty tabysy men múlkiniń bolmaýyna baılanysty alıment óndirý qıynǵa soǵady. Osyǵan baılanysty, óńirlik ádilet departamentteri ákimdiktermen birlesip, boryshkerlerdi turaqty jumysqa turǵyzý jármeńkeler ótkizedi. Mysaly, 2022 jyldyń 5 aıynda respýblıka boıynsha 1 400 boryshker jumysqa ornalastyrylǵan», - dedi Azamat Esqaraev.