Alıment óndirý kúrdeli máselelerdiń biri - mınıstr

ORAL. QazAqparat - Jaǵdaıy bola tura, alıment tóleýden ádeıi jaltaratyn boryshkerler de barshylyq. Bul týraly Ádilet mınıstri Azamat Esqaraev BQO halqyna esep berý kezdesýinde málim etti, dep habarlaıdy QazAqparat tilshisi.

Onyń aıtýynsha, alıment óndirý - tek BQO ǵana emes, búkil el boıynsha kúrdeli máselelerdiń biri.

Mınıstrdiń sózine qaraǵanda, BQO-da barlyǵy 11 memlekettik jáne 50 jeke sot oryndaýshy qyzmet atqarady. Olardyń óndirisinde osy kezge deıin 270 myń atqarýshylyq óndiris bolsa, sonyń 147 myńynda ister aıaqtaldy.

Keıbir jaǵdaılarda boryshkerdiń turaqty tabysy men múlkiniń bolmaýyna baılanysty alıment óndirý qıynǵa soǵady. Osyǵan baılanysty óńirlik ádilet departamentteri ákimdiktermen birlesip boryshkerlerdi jumysqa ornalastyrý úshin turaqty túrde bos oryndar jármeńkesin ótkizedi. Mysaly, 2022 jyly Batys Qazaqstan oblysy boıynsha 118 boryshker jumysqa turdy.

Azamat Esqaraev Ádilet mınıstrliginiń qyzmetine toqtaldy.

«Adamdar kóbinese notarıýstardyń, advokattardyń jáne zań keńesshileriniń kómegine júginedi. Osyǵan oraı biz notarıýstardyń qyzmetterin yńǵaıly paıdalaný úshin birqatar sharalar qabyldadyq», dedi mınıstr.

Aıtalyq, «Notarıat týraly» Zańǵa túzetýler engizildi, soǵan sáıkes qazir jyljymaıtyn múlikpen mámileni rásimdeý ońaıyraq bolady.