Alıment óndire almaı júrgenderge 1 mln teńgege deıin aqsha beriledi

NUR-SULTAN. QazAqparat – Ádilet mınıstri Marat Beketaev «Alıment tóleý qoryna» qarajat jınalyp jatqanyn málim etti, dep habarlaıdy QazAqparat tilshisi.

«Alıment tóleý qory» atty jeke sot oryndaýshylardyń respýblıkalyq palatasynyń janynan arnaıy áleýmettik qor quryldy. Qazirgi tańda turaqty jumysyn qamtamasyz etý úshin osy qorǵa qarajat jınaý kezeńi ótip jatyr. Bul aqshany taratpas buryn ony aldymen jınap alaıyq dep otyrmyz», - dedi Marat Beketaevqa OKQ-da ótken baspasóz máslıhatynda.

Mınıstrdiń aıtýynsha, qorǵa jınalǵan qarajat arnaıy tártippen taratylady.

«Alıment alýy tıis azamattardyń bárine birdeı aqsha berý múmkin emes ekenin birden aıtaıyn. Sebebi aqsha báriniń qajettiligin óteýge báribir jetpeıdi. Syıly ári abyroıly adamdardan turatyn arnaıy komıssııa quryldy. Ony burynǵy senator Serik Baıseıituly Aqylbaı basqarady. Onyń quramyndaǵy múshelerdiń tizimin jeke sot oryndaýshylardyń respýblıkalyq palatasynyń saıtynan kóre alasyz. Naqty sol adamdar kimge qandaı kómek beriletini týraly sheshim qabyldaıdy. Qarajat tek muqtaj azamattarǵa beriledi», - dedi ol.

Onyń sózinshe, bir adamǵa 1 mıllıon teńgeden artyq berilmeıdi.

«Naqty sheshimdi qorǵa qarajat jınaý jumysy aıaqtalǵannan keıin qabyldaımyz», - dedi Marat Beketaev.