Alıment qoryn qurý ata-analardyń jaýapkershiligin tómendetedi - Álıhan Smaıylov

ASTANA. QazAqparat – Premer-Mınıstr Álıhan Smaıylov Májilis depýtattarynyń saýalyna bergen jaýabynda alıment qoryn qurý bastamasy nege qoldaý tappaıtynyn túsindirdi, dep habarlaıdy QazAqparat tilshisi.

«Qazaqstanda mundaı qor qurý týraly bastamany múddeli ýákiletti organdar buǵan deıin de birneshe ret pysyqtaǵanyn aıtý kerek. Sonyń qorytyndysy boıynsha ondaı qur qurý tıimsiz degen sheshim qabyldanǵan bolatyn. Óıtkeni, qordy basqarý, qalyptastyryp, tolyqtyrý bıýdjetten aıtarlyqtaı shyǵyn talap etedi. Onyń ústine, alıment tóleýden jaltaryp júrgenderdiń boryshyn qor qurý arqyly ótetý múmkindigi daýly degen uıǵarymdar aıtyldy.

Qazirgi tańda bul bastama myna negizderge baılanysty qoldaý tappaıdy. Erli-zaıyptylar arasyndaǵy alıment qatynastary «Neke jáne otbasy» Kodeksimen retteledi. Al, alıment tóleý tártibi burynǵy erli-zaıyptylar arasyndaǵy kelisim boıynsha nemese sot sheshimi boıynsha anyqtalady. Qazaqstan Konstıtýtsııasy boıynsha balaǵa qamorlyq kórsetip, tárbıe berý ata-ananyń tabıǵı quqyǵy ári mindeti bolyp esepteledi. Qordan alıment alý ata-analardyń balasyn qamsyzdandyryp, tárbıleýge degen yntasyn tómendetýi múmkin. Óıtkeni, qamqorlyqtyń bári memlekettiń ıyǵyna aýdarylyp, masyldyq kóńil kúı týyndatýy múmkin», - dep jazady Álıhan Smaıylov.

Úkimet basshysynyń sózinshe, qordy qarjylandyryp, qurylymyn basqarýǵa jáne qosymsha qarajat bólý úshin memleket bıýdjetinen qarajat kerek bolady.

«Ondaı qordy qalyptastyryp, tolyqtyrý bıýdjetten alıment boryshkerleriniń qaryzy esebinen kepildendirmeı iske asyrylady. Osyǵan baılanysty alıment óndirý jumystaryn qoldanystaǵy múmkindikter aıasynda kúsheıtý qajet dep topshylaımyz», - delingen jaýapta.