Alık Shpekbaev: Pandemııa kezinde halqynyń qaıǵy-qasireti arqyly baıý – satqyndyq

NUR-SULTAN. QazAqparat - Arsyz sheneýnikter pandemııa kezinde «qaltasyn toltyrýǵa» tyrysty. Bul týraly QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev aıtty, dep habarlaıdy QazAqparat tilshisi.

«2020 jyl – adamzat tarıhyndaǵy eń aýyr kezeńderdiń biri. Álemdegi memlekettik apparat azamattardyń seniminen jappaı aıyrylyp, buryn-sońdy bolmaǵan daǵdarysqa tap boldy. Pandemııa kezinde halyq bılikke úmit artyp, qamqorlyq pen kómek kútip otyrǵanda keıbir arsyz sheneýnikter men top-menedjerler zańnan da, Qudaıdan da qoryqpaı, laýazymyn «qaltasyn toltyrýǵa» paıdalanyp, júıeli túrde para alyp, bıýdjet qarjysyn jymqyrdy. Meniń oıymsha, óz halqynyń qaıǵy-qasireti arqyly baıý – satqyndyq pen adam óltirýge teń!», - dedi Alık Shpekbaev agenttiktiń alqa otyrysynda.

Agenttik basshysynyń dereginshe, pandemııamen baılanysty 100 qylmystyq is tirkeldi. Onyń jartysyna jýyǵy – daǵdarysqa qarsy bólingen qarajatty jymqyrý.

«Biz 100 qylmystyq is tirkedik. Olardyń jartysyna jýyǵy - daǵdarysqa qarsy sharalarǵa bólingen qarajatty jymqyrý. 2 mlrd teńgeden astam somaǵa qymbat baǵaǵa 132 ÓJJ apparatyn satyp alý faktileriniń joly kesildi», - dedi ol.