Alık Shpekbaev: Memlekettik apparattyń basty mindeti – azamattarǵa qoljetimdi qyzmet kórsetý
Agenttik tóraǵasy aldymen Jylyoı aýdanyna baryp, Qulsary qalasyndaǵy halyqty jumyspen qamtý ortalyǵynyń, halyqty áleýmettik qorǵaý jáne jumyspen qamtý bóliminde ashylǵan front-ofıstiń jumysyna nazar aýdardy.
«Qazirgi zamanǵy memlekettik apparattyń basty mindeti – klıentke baǵdarlaný jáne azamattarǵa qolaıly jaǵdaıda qyzmet kórsetý. Memlekettik qyzmetshiler turǵyndardyń ótinish-tilegin muqııat tyńdaýy kerek. Óıtkeni, ár turǵynnyń aldynda bıýrokratııalyq qabyrǵa týyndamaýy tıis», - dedi agenttik tóraǵasy Alık Shpekbaev.
Tóraǵanyń aıtýynsha, memlekettik organdardyń mundaı transformatsııasy qoǵammen belsendi ózara is-qımyl jasaýdyń jáne memlekettik apparattyń azamattardyń suraý salýyna sezimtaldyǵyn arttyrýdyń túıindi sharty bolýy kerek.
Atyraý oblysynda front-ofıster jáne «openspeıster» formatynda 45-ten astam memlekettik organ men mekeme jumys isteıdi. Elektrondyq memlekettik qyzmetterdi yńǵaıly alýdy qamtamasyz etý úshin aýyldyq okrýgter ákimdikteri men mektepterdiń ǵımaratynda ózine-ózi qyzmet kórsetý buryshy ashylǵan. Onda ákimdikterdiń arnaıy qyzmetkerleri men ınformatıka pániniń muǵalimderi azamattarǵa elektrondyq úkimet portalynda qoljetimdi qyzmetterdi óz betinshe alýyna kómektesedi.
Agenttik tóraǵasy Jylyoı aýdanynyń azamattaryn jeke qabyldady. Onda azamattar birneshe aı boıy sheshimin tappaǵan ózekti máselelerimen bólisti.
Al Mahambet aýdanyndaǵy «Azamattarǵa arnalǵan úkimet memlekettik korporatsııasy» KEAQ fılıalynyń jańa ákimshilik ǵımaratynda elektrondy qyzmet kórsetý barysymen tanysty. Munda bıyl 23 myńnan astam memlekettik qyzmet kórsetilgen. Onyń ishinde ózine-ózi qyzmet kórsetý sektory arqyly elektrondyq onlaın-formatta 12 myńnan astam memlekettik qyzmet bar.
QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev Elbasy N. Nazarbaevtyń 2018 jylǵy 5 qazandaǵy Joldaýynda aıtylǵan memlekettik qyzmetterdi elektrondyq formatqa kóshirý jónindegi tapsyrmasynyń oryndalǵanyn atap ótti.
«Qazaqstan elektrondyq úkimetti damytý boıynsha 30 eldiń qataryna kiredi. Kórsetiletin qyzmetterdiń 90%-dan astamy halyq úshin onlaın formatta beriledi. ıAǵnı, qyzmettiń bul túri barsha úshin qoljetimdi. Bul turmystyq sybaılas jemqorlyqty barynsha azaıtty», - dedi A.Shpekbaev.
Eske sala ketelik, budan buryn Atyraýda Qyzylqoǵa aýdany servıstik ákimdik formatyna kóshkenin habarlaǵan edik.