Alık Shpekbaev kásipker jumysyna kedergi keltiretin máseleni kóterdi

NUR-SULTAN. QazAqparat - Sybaılas jemqorlyqqa qarsy is-qımyl agenttiginiń tóraǵasy Alık Shpekbaev ákimdikter janyndaǵy qala qurylysy keńesteri týraly aıtty, dep habarlaıdy QazAqparat tilshisi.

«Qurylystyń qarqyndy damýyn eskere otyryp, osy saladaǵy ákimshilik kedergilerdi joıý máselesi erekshe ózekti. Jobalaý kezeńindegi birinshi másele – sulbalyq jobany kórsetilgen ýaqytta kelisý. Alaıda, is júzinde ákimdikter janyndaǵy qala qurylysy keńesterinde maquldaý kezinde merzimder saqtalmaıdy», – deıdi Alık Shpekbaev elordada ótken kásipkerler forýmynda.

Ol bıznes úshin eń qymbat nárse – ýaqyt ekenin aıtty.

«Ádette rásimderdiń uzaqqa sozylýy men kidirister sybaılas jemqorlyq táýekelderine ákep soqtyrady. 2018 jyly atalǵan keńesterde kelisý rásimi zańdy túrde alynyp, bul olardyń taratylyp ketýine negiz boldy. Eger keıbir ákimdikter keńesterdi óz betinshe taratsa, beseýi Agenttik usynysymen joıyldy, al Qostanaı, Atyraý jáne Aqmola oblystarynda atalǵan keńester óz jumystaryn áli kúnge deıin jalǵastyrýda», - deıdi ol.

Sondaı-aq, jer qatynastaryndaǵy monıtorıng barysynda birqatar másele anyqtalǵan.

«Jerge ornalastyrý qyzmetterimen aınalysatyn kásipkerlerden osyndaı qyzmetterdi kórsetetin «Azamattarǵa arnalǵan úkimet» memlekettik korporatsııasynyń is-áreketine kóptegen shaǵym bar. Memlekettik korporatsııa jer kadastryn júrgizý boıynsha monopolıst bola otyryp, óz jobalaryn jeke menshik jobalarǵa qaraǵanda tezirek maquldaıdy. Bul kásipkerlerge qolaısyz jaǵdaı týdyryp, ádil básekelestikti shekteıdi», - deıdi Alık Shpekbaev.