Alık Shpekbaev: Halyqqa qolaıly jaǵdaı jasalmaǵan jerde jemqorlyq taralady
Sybaılas jemqorlyqqa qarsy vedomstvo basshysy ákimdikterde «bir tereze» qaǵıdatymen azamattarǵa servıstik jáne kedergisiz qyzmet kórsetýge arnalǵan «Kómek alańy» front-keńseleriniń jumysymen tanysty.
Qazir kez kelgen azamat kabınetterdiń tabaldyryǵynda kezek kútpeı-aq front-keńselerge júgine alady. Ákimdikterdiń qyzmetkerleri turǵyn úı-kommýnaldyq sharýashylyq, jer qatynastary, áleýmettik qorǵaý, aýyl sharýashylyǵy jáne basqa da salalar boıynsha keńester beredi.
Elektrondyq qyzmetterdi alý úshin ózine-ózi qyzmet kórsetý buryshtary da qarastyrylǵan.
«Turmystyq sybaılas jemqorlyq azamattar úshin qolaıly jaǵdaı jasalmaǵan jerde taralady. Azamattardyń qajetti zańdy kómek alý úshin memlekettik qyzmetshige syılyq berýine jol joq. Sheneýnikter máseleni sheshý joldaryn taryltyp, keńselerde otyrǵan qyzmetkerlerdiń mańyzyn jasandy túrde asyra kótermeýi tıis. Árbir memlekettik qyzmetshiniń jumys barysynda ustanatyn qaǵıdalary – adaldyq, tártip, qoljetimdilik, ashyqtyq pen ádildik. Ákimdikterdiń yńǵaıly front-keńselerimen megapolısterdiń ǵana emes, shaǵyn kentterdiń turǵyndaryn da qamtamasyz etý qajet», - dep atap ótti Alık Shpekbaev.
Rýdnyı men Lısakov qalalarynda «Kómek alańy» ashylǵan sátten bastap 12 myńnan astam turǵyn júgingen. Jergilikti bıliktiń aıtýynsha, jaqyn arada oblystyń halqy tyǵyz ornalasqan barlyq aýyldarynyń ákimdikteri osyndaı jumys nysanyna kóshedi.
Sondaı-aq, agenttik tóraǵasy jergilikti memlekettik kirister organdaryna baryp, azamattar men kásipkerlerge qyzmet kórsetý zaldarynyń jumysymen tanysty.
Sonymen qatar, Lısakov qalasynda Alık Shpekbaev pen Arhımed Muhambetov kúrdeli jaǵdaılardy sheshýge kómek kórsetý týraly ótinish bildirgen azamattardy birlesken qabyldaý ótkizdi.