Álıhan Smaıylov jylý jelilerin tehnıkalyq tekserýdi 1 maýsymǵa deıin aıaqtaýdy tapsyrdy

ASTANA. QazAqparat – Apatty jaǵdaıda turǵan jekemenshiktegi jylý jelilerin kommýnaldyq menshikke berýdiń qajettiligin anyqtaý kerek. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Óńir ákimdikteri Energetıka, Indýstrııa jáne ınfraqurylymdyq damý mınıstrlikterimen birlesip, barlyq turǵyn úı-kommýnaldyq sharýashylyǵy, turǵyn úı jáne áleýmettik sala obektileriniń aldaǵy 2023-2024 jylǵy jylytý maýsymyna daıyndyǵy boıynsha is-sharalar josparyn bekitip, ony tez arada iske asyrýǵa kirisýi qajet», - dedi Álıhan Smaıylov.

Sonymen qatar, Úkimet basshysy Indýstrııa mınıstrligine Energetıka mınıstrligimen jáne óńir ákimderimen birlesip, 1 maýsymǵa deıin qoldanystaǵy jylý jelileriniń jaǵdaıyna tehnıkalyq tekserý jumystaryn aıaqtaýy kerektigin eskertti.

«Osy jumystardyń qorytyndysy boıynsha apatty jaǵdaıdaǵy jekemenshik jylý jelilerin kommýnaldyq menshikke berýdiń qajettiligin anyqtaý kerek. Nátıjesin meniń jeke ózime baıandańyzdar», - dedi Premer-Mınıstr.

Aıta ketsek, Úkimet basshysy jylý elektr ortalyqtarynyń basshylyǵy men ıeleriniń jaýapkershiligi tómendigin atap ótken edi.