Álıhan Smaıylov jeke málimetter týraly: Qaýip-qaterdiń aldyn alý mańyzdy
Premer-Mınıstr Tsıfrlyq damý, ınnovatsııalar jáne aeroǵarysh ónerkásibi mınıstrliginiń keńeıtilgen alqa otyrysynda qazaqstandyqtardyń jeke málimetteri qaýipsizdigin qamtýǵa erekshe mán berýdi atap ótti.
«Tehnologııanyń jyldam damýyn eskere otyryp, aqparat jáne derekter qaýipsizdigi máselesin esten shyǵarmaý kerek. Onyń ishinde jeke málimetter qaýipsizdigi de bar. Qaýip-qaterdiń aldyn alý – óte mańyzdy. Osy oraıda, mınıstrlik ortalyq jáne jergilikti atqarýshy organdarmen birlesip, aqparattyq júıelerdiń 100% qorǵalýyn qamtamasyz etý jóninde keshendi sharalar qabyldaýy kerek. Sondaı-aq, Astana habtyń qyzmetin keńeıtip, tájirıbesin joǵary oqý oryndary bazasynda jáne óńirlik deńgeıde damytý qajet», - dedi Álıhan Smaıylov jıyn barysynda.
Premer-Mınıstr óńirlerdegi daryndy jastarǵa qoldaý kórsetip, jaǵdaı jasaý kerektigin aıtty. Óńir jastaryna IT mádenıet, ınnovatsııalyq ıdeıalar men úzdik tájirıbeni úırenip, halyqaralyq naryqqa shyǵýda teń múmkindik jasalýy kerek.
«Tehnologııalyq kásipkerlikti damytyp, básekege qabiletti IT baǵdarlamalarmen jumys isteý mańyzdy. Mınıstrlik bul mindetti iske asyrý úshin barlyq óńirde «Astana hab» úlgisi boıynsha tehnologııalyq ortalyqtar ashýy qajet. Bul máseleni jergilikti ákimdiktermen pysyqtaǵan jón», - deıdi Úkimet basshysy.
Buǵan deıin Á. Smaıylov elimizde 5G engizýdi 2027 jylǵa deıin aıaqtaýdy júktegen edi.