Álıhan Smaıylov jańa Energetıka mınıstrine birqatar tapsyrma berdi

ASTANA. QazAqparat - QR Premer-Mınıstri Álıhan Smaıylov jańadan taǵaıyndalǵan energetıka mınıstri Almasadam Sátqalıevti vedomstvo ujymyna tanystyryp, aldaǵy kezeńge arnalǵan energetıka salasyndaǵy basym mindetterdi belgiledi. Bul týraly QazAqparat Úkimettiń saıtyna silteme jasap habarlaıdy.

Úkimet basshysy Energetıka mınıstrliginiń iri munaı-gaz jobalary men eksporttyq kólik dálizderin damytý jumystaryn kúsheıtý, gazdy qaıta óńdeýdi ulǵaıtý jóninde sharalar qabyldaý, jylý jáne elektr energııasyn óndirý sektoryn nyǵaıtý, sondaı-aq jańartylatyn energııa kózderin damytýdy jalǵastyrýy qajettigin atap ótti.

«Sońǵy kezde kóp jyldar boıy qordalanyp kelgen keıbir máselelerdiń beti ashylýda. Dızel otynynyń jetispeýshiligi, elektrmen jáne gazben jabdyqtaýdaǵy aqaýlar, jylýmen jabdyqtaý obektilerindegi apattar – osynyń bári energetıka salasynda eleýli problemalardyń bar ekenin kórsetip otyr. Olardyń barlyǵy jedel túrde sheshilýi kerek», — dedi Álıhan Smaıylov.

Osy oraıda Úkimet basshysy mınıstrliktiń basty mindetteriniń biri ishki naryqty munaı ónimderimen tolyqtyrý ekenin, osyǵan baılanysty olardyń óndirisi men aınalymyn qatań baqylaýda ustaý qajettigin atap ótti.

«Mınıstrliktiń aldynda kóptegen kúrdeli másele tur, olardyń tıimdi sheshilýi otyn-energetıka salasyna ǵana emes, búkil ekonomıkamyzdyń bolashaǵyna tikeleı áser etedi. Almasadam Maıdanuly óziniń bilimi men tájirıbesin energetıka salasyn damytýǵa jumsaıtynyna senimdimin. Jalpy bárimiz Memleket basshysynyń tıisti tapsyrmalaryn birlesip jáne sapaly oryndaýymyz kerek. Jańa mınıstrge jáne búkil ujymǵa tabysty jumys tileımin», — dedi Premer-Mınıstr.

Eske salsaq, búgin Almasadam Sátqalıev Energetıka mınıstri laýazymyna taǵaıyndaldy.