Álıhan Smaıylov túrik ınvestorlaryna tıimdi bolatyn salalardy atady
«Úkimet eldiń ınvestıtsııalyq tartymdylyǵyn jaqsartý boıynsha belsendi jumys júrgizýde. Biz ózimizdiń ınvestıtsııalyq saıasatymyzǵa aıtarlyqtaı ózgerister engizdik. Jahandyq energetıkalyq jáne tehnologııalyq talaptardy kúsheıtý jaǵdaıynda jańa ınvestıtsııalyq saıasat tujyrymdasy jobasyn ázirledik. Jańa ózgerister ekonomıkanyń basym salalarynda ınvestorlar úshin salyqtyq júıeni ońtaılandyrý jáne jeńildetý, sýbsıdııadar jáne basqa da is-sharalardy qamtıdy. Jańa tásilderge sáıkes, biz memlekettik retteýdi azaıtý jáne jekeshelendirýdi jyldamdatý boıynsha tıisti qadamdar qabyldap jatyrmyz. Bul óz kezeginde eńbek ónimdiligin arttyryp, jeke sektordyń jumys isteýine jol ashady», - dedi Á. Smaıylov «Rixos President Astana» qonaq úıinde Qazaqstan-Túrkııa bıznes-forýmynda.
Úkimet basshynyń aıtýynsha, ınvestorlarǵa memlekettik qoldaýdyń túrli sharalary, salyqtyq jeńildikter, kedendik bajdardan bosatý, zattaı granttar berý túrindegi preferentsııalar usynylady. Osy sátti paıdalana otyryp, Á. Smaıylov túrik seriktesterdiń nazaryna birneshe baǵytty usyndy.
«Birinshi, metallýrgııa jáne taý-ken óndirý salasy bizdiń ekonomıkamyzdyń basty sektory bolyp sanalady. Onda ónerkásip pen ulttyq eksporttyń shamamen 20 protsenti shoǵyrlanǵan. Tabıǵı resýrstar qory boıynsha Qazaqstan álemde altynshy orynda, mıneraldy shıkizatty óndirýdiń jalpy kólemi boıynsha 10-shy orynda. Qazir ıgerilmeı jatqan ken oryndaryna tekserý júrgizilýde. Bosaıtyn ken oryndary jańa ınvestorǵa berý úshin aýktsıonǵa shyǵarylady. Bul salanyń damýyna jańadan qabyldanǵan «Jer qoınaýy týraly jáne jer qoınaýyn paıdalaný týraly» kodeks qosymsha yqpal etedi. Ol bizdiń jer qoınaýymyzdyń qoryn odan ári zertteý úishn birqatar jeńildikter berýdi qarastyrylady. Jańa kodeks qabyldanǵan sátten bastap, úsh jylda jer qoınaýyn paıdalanýǵa bergen lıtsenzııalar sany 1600-den astyp, suranystyń aıryqsha artqanyn kórsetti. Túrik bıznesin osy baǵytta birlesip, belsendi jumys isteýge shaqyramyn», - dedi Álıhan Smaıylov.
Ekinshiden, Premer-Mınıstr mashına jasaý salasy – Qazaqstannyń ekonomıkalyq ósý draıverleriniń biri ekenin jetkizdi.
«Bul salaǵa iri sheteldik kompnııalar da belsendi atsalysýda. Mashına jasaý ónimderiniń eksporty ósip, ımport kólemi birtindep azaıýda. Atalǵan sektordyń damýy úshin túrik kompanııalaryn osy salada jobalardy júzege asyrýǵa shaqyramyz. Óıtkeni bul salada jaqsy shıkizat bazasy bar, sondaı-aq eksporttyq áleýeti de óte joǵary. Úshinshi, agroónerkásip kesheni – Qazaqstan úshin strategııalyq baǵyttardyń biri ári túrik kompanııalary úshin zor áleýetke ıe. Qazaqstandaǵy aýyl sharýashylyǵy alqaptary 200 mln gektardan asady, al jaıylymdar – 180 mln gektarǵa jýyq. BUU Azyq-túlik jáne aýylsharýashylyq uıymy Qazaqstandy álemdegi eń perspektıvaly aýyl sharýashylyǵy ónimderin óndiretin bes eldiń biri retinde ári jahandyq ári aımaqtyq azyq-túlik qaýipsizdigin qamtamasyz etýdegi mańyzdy oıynshy retinde tanydy. Agrarlyq saladaǵy ózara tıimdi yntymaqtastyqtyń áleýeti shynymen úlken», - dedi Á. Smaıylov.
Tórtinshiden, Qazaqstan 2030 jylǵa qaraı jańartylatyn energııa kózderi úlesin 15 protsentke deıin ulǵaıtýǵa jáne 2060 jylǵa qaraı kómirtekti beıtaraptyqqa jetýge nıetti. Qazaqstan energetıka salasyndaǵy jobalardy júzege asyrý úshin joǵary dárejedegi tájirıbeli túrik kompanııalarynyń qatysýyna múddeli. Úkimet óz tarapynan jańarytlatyn energııa salasyndaǵy jobalardy sátti jasaý úshin qajetti birqatar qoldaý sharalaryn usynýǵa daıyn.
«Besinshi, Astana halyqaralyq qarjy ortalyǵy qarjy sektoryndaǵy yntymaqtastyqtyń ózara tıimdi perspektıvalaryn usynady. Oǵan qatysýshylarǵa 50 jylǵa deıin salyq jeńildikteri, jeńildetilgen valıýtalyq, vızalyq jáne eńbek rejımderi qarastyrylǵan. Aǵylshyn quqyqyǵyna negizdelgen táýelsiz sot jáne halyqaralyq tórelik ortalyǵy ádildikke jáne ınvestorlardyń quqyqtaryn qorǵaýǵa kepildik beredi. Qazirgi ýaqytta ortalyqta 17 túrik kompanııasy tirkelgen, qatysýlaryńyzdy odan ári keńeıtýge shaqyramyz», - dedi Álıhan Smaıylov.
Aıta keteıik, elordada Túrkııa Respýblıkasynyń Vıtse-Prezıdenti Fýat Oktaı myrzanyń Qazaqstan Respýblıkasyna sapary sheńberinde Qazaqstan-Túrkııa bıznes-forýmy ótip jatyr.
Qazaqstan men Túrkııa 68 tarmaqtan turatyn birlesken is-qımyl josparyn qabyldady. Onda saýda, ónerkásip, ınvestıtsııa, kólik pen tranzıt jáne taǵy basqa salalar qamtylǵan.
Pandemııaǵa qaramastan úshinshi jyl qatarynan Qazaqstanǵa Túrkııadan rekordyq kólemde ınvestıtsııalar salyp keledi.