Álıhan Smaıylov Tájikstan Prezıdentimen kezdesti

ASTANA. QazAqparat - Astanada Qazaqstan Premer-Mınıstri Álıhan Smaıylov pen elimizge memlekettik saparmen kelgen Tájikstan Prezıdenti Emomalı Rahmonnyń kezdesýi ótti, dep habarlaıdy QazAqparat Úkimettiń resmı saıtyna silteme jasap.

Taraptar ekijaqty yntymaqtastyqtyń, onyń ishinde saýda, ónerkásip, aýyl sharýashylyǵy, ınvestıtsııalyq qyzmet, sondaı-aq kólik-logıstıka jáne sý-energetıka salalaryndaǵy ózara is-qımyldyń keń aýqymdy máselelerin talqylady.

Premer-Mınıstr Tájikstan Qazaqstannyń aımaqtaǵy mańyzdy saýda-ekonomıkalyq seriktesteriniń biri ekenin atap ótti. Máselen, ótken jyldyń qorytyndysy boıynsha ekijaqty taýar aınalymy 19%-ǵa ósip, $1,4 mlrd-qa jetti.

«Biz ózara saýdany odan ári keńeıtý úshin aıtarlyqtaı áleýetti kórip otyrmyz. Taýar aınalymyn $2 mlrd-qa jetkizý jónindegi alǵa qoıǵan mindetimizge sáıkes biz Tájikstan Úkimetimen birlesip saýda-ekonomıkalyq qarym-qatynasty keńeıtý boıynsha jumys istep jatyrmyz», — dedi Álıhan Smaıylov.

Premer-Mınıstr atap ótkendeı, bul baǵytta Ekonomıkalyq yntymaqtastyq jónindegi Qazaqstan-Tájikstan úkimetaralyq komıssııasy mańyzdy ról atqarady, onyń kezekti otyrysy osy jyldyń sáýir aıynda sátti ótken bolatyn. Sonymen qatar 2023-2024 jyldarǵa arnalǵan taýar aınalymyn arttyrý boıynsha jol kartasy qabyldandy.

Sondaı-aq Álıhan Smaıylov 3 mamyrda kóptegen kásiporyndardyń ókilderi qatysqan birlesken bıznes-forým eki eldiń bıznes-qaýymdastyqtarynyń jaqyndasýyna septigin tıgizgenin aıtty. Nátıjesinde jalpy quny $20 mln-dy quraıtyn birqatar mańyzdy kommertsııalyq qujattarǵa qol qoıyldy.

«Qazaqstan Respýblıkasynyń Úkimeti Tájikstan Respýblıkasymen saýda-ekonomıkalyq yntymaqtastyqty keńeıtý úshin bar kúsh-jigerin salady. Bıyl qazaq-tájik yntymaqtastyǵynyń joǵary qarqyny barlyq baǵyttar boıynsha damıtynyna senimdimin», - dedi Premer-Mınıstr.

Óz kezeginde Tájikstan Prezıdenti Emomalı Rahmon respýblıkalar arasyndaǵy strategııalyq áriptestikti odan ári nyǵaıtýdyń joǵary áleýetin atap ótti.

«Bizdiń qarym-qatynasymyzdy damytý úshin qajetti alǵysharttar bar. Barlyq negizgi baǵyttarda ózara tıimdi is-qımyldyń baı tájirıbesi jınaqtaldy. Men búgin qabyldanǵan Odaqtastardyń ózara is-qımyly týraly deklaratsııanyń tarıhı mańyzyn erekshe atap ótkim keledi. Bul bizdiń yntymaqtastyǵymyzdy nyǵaıtýǵa keń jol ashady», — dedi Emomalı Rahmon.

Tájikstan basshysy eki eldiń bıznes-qaýymdastyqtaryn jaqyndastyrýdyń, ekijaqty saýdany arttyrýdyń jáne ózara mádenı-gýmanıtarlyq is-qımyldy jandandyrýdyń mańyzdylyǵyn atap ótti.

«Biz Qazaqstanmen eshbir shekteýsiz barlyq salada yntymaqtasýǵa daıynbyz», — dedi Emomalı Rahmon.