Álıhan Smaıylov taý-ken salasyndaǵy óndiris kólemin qalpyna keltirýdi tapsyrdy
«Memleket basshysy Qasym-Jomart Kemeluly Toqaev Úkimettiń aldyna qazirgi ýaqyttyń talaptary men synaqtaryna jaýap beretin jańa maqsat-mindetterdi qoıyp otyr. Olar Prezıdenttiń Saılaýaldy baǵdarlamasynda, Qazaqstan halqyna Joldaýynda jáne Úkimettiń keńeıtilgen májilisinde berilgen. Indýstrııa mınıstrligi – elimizdegi asa mańyzdy jobalardy júzege asyratyn negizgi memlekettik organnyń biri. Bul sizderdiń ujymdaryńyzǵa zor jaýapkershilik júkteıdi», - dedi Álıhan Smaıylov Indýstrııa jáne ınfraqurylymdyq damý mınıstrliginiń keńeıtilgen alqa otyrysynda.
Osy oraıda, Úkimet basshysy mınıstrlik nazar aýdarýy tıis baǵyttarǵa toqtaldy.
«2022 jyldyń qorytyndysy boıynsha óńdeý ónerkásibindegi óndiris kólemi 3,4 paıyzǵa ósti. Degenmen, 2021 jylǵa qaraǵanda byltyr taý-ken óndirý salasynyń damý qarqyny birshama baıaýlap ketti. Oǵan álemdegi kúrdeli geosaıası jaǵdaı, jahandyq logıstıkalyq baǵyttardyń buzylýy sııaqty kóptegen faktorlar áser etkeni belgili. Soǵan qaramastan, taý-ken salasyndaǵy óndiris kólemin qalpyna keltirip, turaqty ósýdi qamtamasyz etý óte mańyzdy», - dedi Úkimet basshysy.