Álıhan Smaıylov Soltústik Qazaqstan oblysyn damytý jóninde tapsyrmalar berdi
Oblys ákimi Qumar Aqsaqalov, ulttyq ekonomıka mınıstri Álibek Qýantyrov, ındýstrııa jáne ınfraqurylymdyq damý mınıstri Qaıyrbek Óskenbaev, aýyl sharýashylyǵy mınıstri Erbol Qarashókeev, energetıka, qarjy, bilim jáne ǵylym, ekologııa, geologııa jáne tabıǵı resýrstar vıtse-mınıstrleri baıandama jasady.
Baıandamashylardy tyńdaǵan QR Premer-Mınıstri Memleket basshysynyń tapsyrmasy boıynsha ótken jyldyń mamyr aıynda Soltústik Qazaqstan oblysynyń 2025 jylǵa deıingi áleýmettik-ekonomıkalyq damýynyń keshendi jospary qabyldanǵanyn, oǵan 1,8 trln teńge qarastyrylǵanyn atap ótti. Bul jospar birqatar mańyzdy jobalardy iske asyrýǵa, sonyń ishinde jańa ónimder shyǵarýǵa, turaqty jumys oryndaryn qurýǵa, jalpy oblys turǵyndarynyń turmys sapasyn jaqsartýǵa múmkindik beredi.
«Óńir basshylyǵynyń aldynda turǵan negizgi mindetterdiń biri – belgilengen jobalardy ýaqytyly jáne sapaly iske asyrý, sebebi olar áleýmettik-ekonomıkalyq damýǵa qosymsha serpin berýi tıis. Osy maqsatqa jetý úshin Úkimet tarapynan barlyq qajetti qoldaý kórsetilip jatyr», — dedi Álıhan Smaıylov.
Máselen, 2022 jyly Soltústik Qazaqstan oblysyn damytýǵa 108,6 mlrd teńge somasynda shyǵyndar kózdelgen. Respýblıkalyq bıýdjetti naqtylaý kezinde qosymsha 72,7 mlrd teńge bólinedi.
«Birinshi kezekte bul shyǵyndar óńirdiń áleýmettik jáne ınjenerlik ınfraqurylymyn damytýǵa jumsalýy tıis. Osy baǵytta sapaly nátıjelerge qol jetkizý úshin bólingen qarajattyń tıimdi ıgerilýin qamtamasyz etý qajet», — dedi QR Premer-Mınıstri.
Keńes barysynda Álıhan Smaıylov basqa da birqatar máselege nazar aýdardy.
Álemdegi azyq-túlik taýarlary baǵasynyń kúrt ósýin atap ótken Úkimet basshysy barlyq memlekettik organdar men óńirlerdiń basshylyǵynyń mindeti tıisti sharalardy qabyldap, ishki naryqtaǵy baǵanyń negizsiz ósýine jol bermeý ekenin atap ótti.
«Soltústik Qazaqstan oblysynda jyl basynan beri áleýmettik mańyzy bar azyq-túlik taýarlarynyń baǵasy 12,6%-ǵa ósti. Azyq-túlik tapshylyǵy men baǵa ósimin boldyrmaý úshin qolda bar barlyq tetikterdi tıimdi paıdalanǵan jón. Ákimdik baǵa ústemesin baqylaýdy kúsheıtýi kerek, ol 15%-dan aspaýy tıis», — dedi QR Premer-Mınıstri.
Álıhan Smaıylov ońtústik óńirlerden jáne Ortalyq Azııadaǵy kórshi memleketterden erte pisetin kókónisterdi ákelý úshin tikeleı sharttar jasasý qajet ekenin aıtty.
Sonymen qatar saýda jelileri arqyly «aınalym shemasy» tetigin keńinen paıdalaný qajet, al forvardtyq mehanızm arqyly aýyl sharýashylyǵy ónimderin jetkizýge tikeleı kelisimder jasasý kerek.
Sondaı-aq Premer-Mınıstr oblysta jalpy quny 320 mlrd teńge bolatyn 37 ınvestıtsııalyq jobanyń pýly iske asyrylyp jatqanyn atap ótti. Solardyń arqasynda 4 myńnan astam jańa turaqty jumys orny ashylady.
«Bıyl 1 myńnan astam jańa jumys ornyn ashyp, 36,2 mlrd teńgege 19 ınvestıtsııalyq jobany júzege asyrý josparlanyp otyr. Oblys ákimdigi barlyq jobalardy josparlanǵan merzimde sapaly iske asyrýdy qamtamasyz etýi qajet», — dep atap ótti QR Úkimetiniń basshysy.
Álıhan Smaıylov Indýstrııa jáne ınfraqurylymdyq damý, Qarjy jáne Ulttyq ekonomıka mınıstrlikterine 2022 jylǵy shilde aıynyń aıaǵyna deıin respýblıkalyq mańyzy bar «Petropavl – Qorǵan» kúre jolynyń ýchaskesi boıynsha jobalaý-smetalyq qujattamanyń qunyn túzetýdi aıaqtaýdy; 2023 jyldyń sońyna deıin atalǵan ýchaskeni rekonstrýktsııalaý jumystaryn tolyq aıaqtaýdy; osy jyldyń sońyna deıin normatıvtik jaǵdaıdaǵy joldardyń joǵary úlesin qamtamasyz etýdi tapsyrdy.
Keńesti qorytyndylaı kele, Premer-Mınıstr Soltústik Qazaqstan oblysy basshylyǵynyń aldyna barynsha tıimdi sheshýdi qajet etetin aýqymdy jáne jaýapty mindetter qoıylǵanyn atap ótti.