Álıhan Smaıylov saılaýda óz tańdaýyn jasady

ASTANA. QazAqparat – Úkimet basshysy Álıhan Smaıylov Májilis jáne máslıhattar depýtattary saılaýynda daýys berdi, dep habarlaıdy QazAqparat tilshisi.

Ol Astanadaǵy QR Ulttyq kitaphanasynyń ǵımaratynda ornalasqan №111 saılaý ýchaskesinde óz tańdaýyn jasady.

Atalǵan saılaý ýchaskesinde 2744 daýys berýshi tirkelgen.

Buǵan deıin habarlaǵanymyzdaı, Astana ýaqytymen tańǵy saǵat 4-te Seýlde №258 jáne Tokıoda №261 saılaý ýchaskeleri álemde birinshi bolyp ashyldy.

Ońtústik Koreıadaǵy QR azamaty kýrsant Asanov Elnýr birinshi bolyp daýys berdi.

QR Konstıtýtsııasyna sáıkes, Parlament Májilisi aralas saılaý júıesi boıynsha Konstıtýtsııalyq zańda belgilengen tártippen saılanatyn 98 depýtattan turady. Biryńǵaı jalpyulttyq saılaý okrýgi aýmaǵy boıynsha, ıaǵnı partııalyq tizim boıynsha Májilistiń 69 depýtaty, bir mandatty aýmaqtyq saılaý okrýgteri boıynsha – 29 depýtat saılanady.

19 qańtarda Memleket basshysy Qasym-Jomart Toqaev jetinshi saılanǵan QR Parlamentiniń Májilisin taratý jáne 19 naýryz kúni Parlament Májilisi depýtattarynyń kezekten tys saılaýyn taǵaıyndaý týraly Jarlyqqa qol qoıǵan edi. Bul kúni Májilispen qatar máslıhat depýtattaryn da kezekten tys saılaý usynyldy.

Bul kúni 12 mln-ǵa jýyq azamat tańdaý jasaıdy. Aldyn ala turǵylyqty jeri boıynsha 11 970 406 saılaýshy anyqtaldy. Saılaýshylardyń eń kóbi – 1 177 507 saılaýshy Túrkistan oblysynda, al eń azy – 138 277 saılaýshy Ulytaý oblysynda tirkelgen.