Álıhan Smaıylov «Samuryq-Qazyna», «Báıterek», «QazAgro» týraly aıtty
Shara barysynda depýtattar «QazAgro» holdınginiń aınalasynda týyndaǵan máseleni kóterdi.
«Jyl saıyn Úkimet pen Esep komıtetiniń esebin talqylaý kezinde kvazımemlekettik sektordaǵy birqatar iri kompanııanyń qyzmeti depýtattyq korpýstyń narazylyǵyn týdyrady. Bıýdjet qarajatynyń mıllıardtaǵan teńgesi tıimsiz paıdalanylady, ýaqytyly jumsalmaıdy, keı kezderi olar arnaıy shottarda múldem paıdalanylmaı jatady. Mysal retinde «QazAgro» holdıngin alaıyq. Sońǵy tórt jyl ishinde olarǵa respýblıkalyq bıýdjetten shamamen 473 mıllıard teńge bólingen. 2016 jyly holdıng shyǵyndary 92,3 mıllıard teńgeni, 2018 jyly 126 mıllıard teńgeni qurady. Osy jyldary olar memleketke bir teńge de dıvıdend tólegen joq», - dep toqtaldy depýtat Jeksenbaı Dúısebaev.
Osy orada ol Memleket basshysynyń tapsyrmasy aıasynda memlekettik holdıngter, ulttyq kompanııalardyń tıimdiligine júrgizilgen taldaýdyń qorytyndysyn surady.
Óz kezeginde Álıhan Smaıylov atalǵan tapsyrma boıynsha tıisti jumys toby qurylǵanyn atap ótti. Ulttyq holdıngter boıynsha «Samuryq-Qazyna», «Báıterek» jáne «QazAgro» jumystaryna tıisti taldaý júrgizildi.
«Negizgi kemshilikterge toqtalsaq, atalǵan holdıngterdiń róli men orny bizdiń memlekettik josparlaý júıesinde joq dep aıtýǵa bolady. Ekinshiden, keıbir ınvestıtsııalyq jobalary tıimsiz. Sosyn, boryshtyq mindettemeleriniń ósýi baıqalady. Osyndaı kemshilikter kórindi. Osyǵan sáıkes, tıisti usynystardy berdik. Birinshiden,memlekettik holdıngterdiń strategııalyq josparlaý jumystaryn jetildirý kerek jáne olardyń kórsetkishterin memlekettik josparlaý júıesiniń kórsetkishterine sáıkestendirýimiz qajet. Ekinshiden, olardyń satyp alýlaryn biryńǵaı zańmen qamtamasyz etýimiz kerek. Qazir biryńǵaı satyp alý zańnamasy boıynsha jobasyn ázirlep jatyrmyz», - dedi Úkimet basshysynyń birinshi orynbasary.
Onyń sózine qaraǵanda, osy baǵytta birqatar usynystar byltyr jeltoqsan aıynda Prezıdent Ákimshiligine engizildi.
«QazAgro» holdıngin jeke aıtatyn bolsaq, ózderińiz bilesizder, byltyr «QazAgronyń» aldynda ońtaılandyrý boıynsha úlken tapsyrmalar qoıyldy. Nátıjesinde, qazir biz kórip otyrmyz, shtat sany qysqardy. Bıyl taǵy da «QazAgronyń» shyǵyndary 2 mlrd teńgege azaıady. Jalpy, shyǵyndar on bes ese azaıyp, bıyl olar taza tabysqa shyǵady. Salany qarjylandyrý 77 mlrd teńgege, ıaǵnı, 400 mlrd teńgeden 477 mlrd teńgege ulǵaıdy. Endi bul alǵashqy nátıjeler», - deıdi Á. Smaıylov.
Onyń paıymynsha, aýyl sharýashylyǵyn qarjylandyrýǵa negizdelgen ınstıtýttar bolýy kerek.
«...Eger biz bul holdıngti taratyptastap, tek bank sektoryna senetin bolsaq, bankter eshqashan ol jerge (aýyl sharýashylyǵy salasyna) barmaıdy. Nege deseńiz, olardyń talaptary óte qatal. Sondyqtan aýyl sharýashylyǵyn qoljetimdi tarıf boıynsha qarjylandyratyn memlekettik ınstıtýttar kerek. Siz aıtqandaı, jumysyn ońtaılandyrýymyz kerek, tıimdiligin kóterýimiz kerek», - dedi Álıhan Smaıylov.