Álıhan Smaıylov revaktsınatsııa jaıly: Ákimdikter máseleni jeke baqylaýǵa alýy tıis
«Elorda, Almaty, Shymkent qalalarynda jáne Atyraý oblysynda koronavırýs ınfektsııasymen naýqastanýdyń kúrt óskenin kórip otyrmyn. Olar «qyzyl» aımaqqa ótti. Alty óńir «sary» aımaqta tur. Bizdiń negizgi mindetimiz - epıdemıologııalyq ahýaldy baqylaýda ustaý. Halyqtyń sanıtarııalyq-epıdemıologııalyq talaptardy saqtaýy boıynsha is-sharalardy kúsheıtý qajet. Densaýlyq saqtaý mınıstrligi, ákimdikter PTR-testileý sanyn ulǵaıtsyn. Jedel monıtorıng júrgizip, medıtsına qyzmetkerlerimen aýrýhanalarda rezervtik oryndardyń daıyndyǵyn qamtamasyz etsin. Dári-dármek pen medıtsınalyq buıymdardyń jetkilikti bolýyn qadaǵalaý qajet», - dedi Álıhan Smaıylov búgin Úkimet otyrysynda.
Úkimet basshysy úıde medıtsınalyq kómek kórsetý úshin mobıldi brıgadalardyń jumysyn jandandyryp, olardy tegin dári-dármekpen qamtamasyz etý kerektigin, dárihanalarda dári-dármektiń tapshylyǵyna jol bermeý sharalaryn qabyldaý qajettigin eskertti.
«Revaktsınatsııa jasaý qarqyny da óte tómen. Sondyqtan Densaýlyq saqtaý mınıstrligi men ákimdikterge halyqqa revaktsınatsııa jasaý qarqynyn barynsha arttyrýdy tapsyramyn. Ákimdikter bul máseleni jeke baqylaýǵa alýy tıis», - dedi Premer-Mınıstr.