Álıhan Smaıylov respýblıkalyq bıýdjet kirisi josparynyń oryndalmaý sebebin túsindirdi

NUR-SULTAN. QazAqparat – 2020 jyldyń qańtarynda memlekettik bıýdjet kiristeri 104,8 paıyzǵa oryndaldy. Bul týraly Úkimet otyrysynda QR Premer-Mınıstriniń birinshi orynbasary - Qarjy mınıstri Álıhan Smaıylov aıtty, dep habarlaıdy QazAqparat tilshisi.

«Memlekettik bıýdjet kiristeri esepti kezeńniń josparyna qaraǵanda 104,8 paıyzǵa, onyń ishinde respýblıkalyq – 86,8 jáne jergilikti bıýdjetter – 153 paıyzǵa oryndaldy. Respýblıkalyq bıýdjettiń kiristeri 331 mlrd teńgeni qurady. Jospar 50 mlrd teńgege, onyń ishinde salyqtar boıynsha 52 mlrd teńgege oryndalmady. Oryndalmaý somasy 79 mlrd teńge qosylǵan qun salyǵy boıynsha qalyptasty», - dedi ol.

Osy rette birinshi vıtse-premer jospardyń oryndalmaýynyń negizgi sebepterin atady.

«Birinshiden, ishki taýarlarǵa salynatyn qosylǵan qun salyǵynyń qaıtarylǵan debettik somasy osy jyldyń qańtar aıynda ótken jyldyń uqsas kezeńinen 19 ese asyp tústi. Qaıtarý somasy 2019 jylǵy 1,2 mlrd teńgemen salystyrǵanda 22,8 mlrd teńgeni qurady. Ekinshiden, ótken jyldyń sáıkes kezeńimen salystyrǵanda ımport kóleminiń azaıýy jáne de 2019 jyly birqatar salyq tóleýshilerden birjolǵy tólemder túsken bolatyn», - dedi Álıhan Smaıylov.

Onyń dereginshe, korporatıvtik tabys salyǵy boıynsha jospar 10 mlrd teńgege artyǵymen oryndaldy. Alaıda, ótken jyldyń qańtar aıymen salystyrǵanda onyń kólemi 17 mlrd teńgege azaıyp otyr.

«Túsimderdiń azaıýyna metallýrgııa óndirisinde shoıyn, bolat, ferroqorytpa baǵalarynyń 3,8, negizgi asyl jáne tústi metaldardyń baǵasynyń ortasha 5,6 paıyzǵa tómendeýi sebep boldy», - dedi ol.