Álıhan Smaıylov Prezıdenttik synaq pen kópsaıys federatsııalar odaǵyn basqarady
Elordada ótken odaqtyń kezekten tys otyrysynda QR Mádenıet jáne sport mınıstri Aqtoty Raıymqulova jańa saılanǵan odaq prezıdentine qyzmette sáttilik tilep, atalǵan odaqtyń jumysynyń asa mańyzdy ekenine toqtaldy. Prezıdenttik testilerdiń ult densaýlyǵyn saqtaý, óskeleń urpaqty salaýatty ómir saltyna shaqyrýda asa mańyzdy ekenin jetkizdi.
«2019 jyly Qazaqstan Respýblıkasy Tunǵysh Prezıdenti Elbasynyń testilerin tapsyrýdyń ekinshi toqsanyna elimizde 3 463 690 adam qatysyp, onyń ishinde 49387 adam Prezıdentik deńgeıdegi normatıvterdi, 145 222 adam ulttyq deńgeıdegi normatıvterdi oryndady. Prezıdenttik synaq jáne Prezıdenttik kópsaıys federatsııalar odaǵy osylaısha joǵary nátıjelermen «B» tobyna endi», - dedi mınıstr Álıhan Smaıylovty quttyqtaı otyryp.
Óz kezeginde Álıhan Smaıylov Memleket basshysynyń halyqtyń densaýlyǵyn jaqsartýǵa óz Joldaýynda asa zor kóńil bólgenin atap ótti.
«Ol úshin buqaralyq sportty ary qaraı damytýymyz kerek. Elimizdegi árbir azamattyń óz densaýlyǵy úshin sportpen aınalysqany óte mańyzdy. Buqaralyq sport túrleri pıramıda ispettes bolýy tıis. Eń joǵarǵy shyńynda chempıondar tursa, keıin belsendi ári saý jastar turýy tıis. Ultymyz myqty bolýy kerek. Búkil halyq úshin sporttyq ınfraqurylymnyń qoljetimdi bolǵany durys», - dedi Álıhan Smaıylov elordanyń «Saryarqa» velogtreginde ótken odaqtyń kezekten tys otyrysynda.