Álıhan Smaıylov polıtsııany tsıfrlandyrý jumysymen tanysty

ASTANA. QazAqparat - QR Premer-Mınıstri Álıhan Smaıylov Іshki ister mınıstrliginde boldy, dep habarlaıdy QazAqparat Úkimettiń baspasóz qyzmetine silteme jasap.

Ol qylmystyń aldyn alý men olardy ashýda zamanaýı tehnologııalardy qoldaný, jalpy polıtsııa jumysyn tsıfrlandyrý barysymen, jańa oqý jyly qarsańynda mektepterdegi qaýipsizdikti qamtamasyz etý sharalarymen tanysty.

Vedomstvo basshysy Marat Ahmetjanovtyń baıandaýynsha, Іshki ister mınıstrligi respýblıkadaǵy qalalardyń kósheleri men qoǵamdyq oryndarynda «tolyq qamtý» prıntsıpimen beınebaqylaý engizýde.

Jyl basynan beri polıtsııanyń jedel basqarý ortalyqtaryndaǵy (JBO) beınekameralar arqyly 6 myń qylmys ashyldy, 2,7 mln jol erejesin buzý, sondaı-aq 312 myń basqa da ákimshilik quqyq buzýshylyq anyqtaldy.

Nátıjesinde, bıyl elimizdegi qylmys kórsetkishi 17%-ǵa tómendegen.

«Tsıfrlandyrý arqyly tıisti memlekettik qyzmetter jumysynyń tıimdiligin arttyrýǵa bolatynyna talaı ret kózimiz jetti. Nátıjesinde eńbek ónimdiligi artyp, jemqorlyq faktileri azaıýda. Tsıfrlyq tehnologııalardy engizý arqyly Іshki ister mınıstrligi de jaqsy nátıjelerge qol jetkizip otyr. Endi muny aımaqtarda odan ári kezeń-kezeńimen júzege asyrý qajet», — dedi Álıhan Smaıylov.

Budan bólek, Úkimet basshysy mektepterdegi qaýipsizdikti qamtamasyz etý jumystarymen tanysty.

Atap aıtqanda, oqý oryndarynda ornatylǵan beınekameralardaǵy jazbalar men dabyl túımesheleriniń sıgnaldaryn jedel basqarý ortalyqtaryna jáne polıtsııanyń kezekshi bólimshelerine shyǵarý barysy kórsetildi.

Búginde mundaı sharalarmen 3 654 mektep qamtylǵan, beınebaqylaý kamerasy 7 600 mektepte ornatylǵan. Olardy qosý jumystary jalǵasyp jatyr.

Budan bólek, Úkimet basshysy «Tsıfrlyq polıtseı» jobasy aıasynda satyp alynǵan jańa beınejetondardyń jumysyn baǵalady.

Sondaı-aq Premer-Mınıstrge polıtsııaǵa jol erejesin buzǵandardy anyqtaýǵa kómektesetin «Qorǵaý» júıesiniń erekshelikteri týraly baıandaldy.

Álıhan Smaıylov turmystyq zorlyq-zombylyq úshin jaýapkershilikti kúsheıtý sharalaryn júzege asyrý barysymen, kóshi-qon salasyndaǵy memlekettik qyzmetterdi kórsetý jumystarynyń nátıjesimen jáne CyberPol ınternet-alaıaqtyqpen kúres jónindegi jobamen tanysty.

Sonymen qatar kadrlyq protsesterdi avtomattandyrý qorytyndysy, jedel qyzmet, qoǵamdyq tártipti qamtamasyz etý jáne jalpy quqyq buzýshylyqtyń aldyn alý boıynsha ózekti máseleler qaraldy.