Álıhan Smaıylov pedagogterdi áleýmettik qoldaý jóninde tapsyrma berdi

NUR-SULTAN. QazAqparat – QR Premer-Mınıstri Álıhan Smaıylov ákimdikter men Bilim jáne ǵylym mınıstrligine pedagogterdi áleýmettik qoldaý jóninde tapsyrmalar berdi, dep habarlaıdy QazAqparat tilshisi.

«Memleket basshysy 2022 jyldy Balalar jyly dep jarııalady. Osyǵan oraı balalardy sapaly bilim berý arqyly jan-jaqty damytatyn mańyzdy is-sharalardy qarastyrý qajet.

Mektepke deıingi bilim berýde sapany baǵalaý quraldaryn kúsheıtip, balalardy erte kezden damytýdyń álemdik kórsetkishterin engizgen jón», - degen Úkimet basshysy orta bilim berýde qala men aýyl mektepterindegi oqytý sapasyn teńestirip, mektep oqýshylarynyń fýnktsıonaldyq saýattylyǵyna, balanyń tulǵalyq qasıetterin qalyptastyrýǵa basa mán berý qajettigin atady.

«Pedagogterdi áleýmettik qoldaý baǵdarlamasy aıasynda ákimdikter men Bilim mınıstrligi kadr tapshy óńirlerge ustazdardy tartý úshin qosymsha aqy tóleý, turǵyn úımen qamtamasyz etý, kommýnaldyq qyzmetterge ótemaqy tóleý jónindegi sharalardy qarastyrǵan jón.

Jaqyn ornalasqan mektepten tys uıymdardy tegin mektep úıirmelerin, sport sektsııalaryn, aýla klýbtaryn kóbeıtý jumysyn júrgizý qajet. Kásiptik-tehnıkalyq bilim berý júıesin reformalaýdy jalǵastyrý kerek. Onyń sapasyn, tásilderi men materıaldyq-tehnıkalyq qamtamasyz etilýin túbegeıli ózgertken jón», - dedi Álıhan Smaıylov.